पहाड़ी गल्लां-ः पुराणा डाल़ बडणा नवां कोई नी लाणा
डेढ़ सौ साल पुराणा डाल़ बडया करदे
तिसरिया जगह नवां कोई नी लगायादे
छोटियाँ सडकां ने हुई जाणा था गुज़ारा
ढिगां रुढाई कने फोरलेन कजो बणायादे
हुण चलया फोरलेन शिमले जो उजड़े ढाबे खोखे वाले
नौणी विनायकघाट ब्रह्मपुखर दोबारा बणगे हुण सारे
खून पसीने ने बणाइरे उजड़ी गए सै मकान
तीन सौ साल पुराणे पीपल़ बी बडी कने सट्टे कनारे
इस साल करोड़ां फोरलेना पर लाणा
अगले साल कुदरता सै पीह रुढाणा
जे एहड़ा नी हो बार बार ढए नी कुछ बी
तां महकमे वाल़ेयां रा कम्म कियां चलना क्या खाणा
छोटे जे डाल़ा लाणे जो सारे
वन महोत्सव हर साल मनान्दे
लगदा नी कोई बी डाल देखदा नी कोई
पाणी देंदेयां रा हर साल फोटो खिचांदे
नवें डाल़ा रा पेड़ बणन्देयां लगी जाणी सदियां
सडकां रे नावां पर डाल़ बड्डी कने जेबां अपणी भरियाँ
करोड़ां फुकी दिते नवें डाल़ लगाणे रे नावां पर
पर घटया करदे जंगल जमीनां साफ हुई गी सारियां
रवींद्र कुमार शर्मा
घुमारवीं
जिला बिलासपुर हि प्र
