शीतकालाय विधिवत् पिहितानि श्रीकेदारनाथधाम्नः कपाटानि

शीतकालाय विधिवत् पिहितानि श्रीकेदारनाथधाम्नः कपाटानि; शीतकालीन-गद्दीस्थलं प्रति प्रस्थिता भगवतः पञ्चमुखी डोली
देहरादूनम्उत्तराखण्डराज्यस्य रुद्रप्रयाग-जनपदस्य उच्च-हिमाच्छादित-पर्वतशृङ्खलासु स्थितस्य विश्वप्रसिद्धस्य एकादश-ज्योतिर्लिङ्गस्य श्रीकेदारनाथधाम्नः कपाटानि बुधवासरे प्रातः सार्धाष्टवादने (८:३० वादने) पूर्वपरम्परानुसारं भ्रातृद्वितीयायाः (भैयादूज) अवसरे विधि-विधानेन मन्त्रोच्चारणेन च सह शीतकालाय पिहितानि (बन्द) अभवन्। अस्मिन् मङ्गलमये अवसरे श्रीबदरीनाथ-केदारनाथ-मन्दिर-समितेः (बी.के.टी.सी.) अध्यक्षः श्रीहेमन्तद्विवेदीमहोदयः तथा च पञ्चसहस्राधिकाः श्रद्धालवः कपाटपिधानस्य साक्षिणः अभवन्। उल्लेखनीयम् अस्ति यत् अस्मिन् यात्रावर्षे अद्यावधि ऐतिहासिकया सङ्ख्यया सार्धैकोनविंशति-लक्षं (१९.५० लाख) तीर्थयात्रिभिः श्रीकेदारनाथधाम्नः दर्शनं कृतम् अस्ति।कपाटपिधानस्य अवसरे श्रीमन्दिरं विविधैः पुष्पैः अलङ्कृतम् आसीत्। दानदातृभिः तथा च भारतीय-तिब्बत-सीमा-पुलिस-बलेन (आई.टी.बी.पी.) श्रद्धालुभ्यः भण्डाराणां (अन्नक्षेत्राणां) आयोजनं कृतम्। विगतदिनेषु समीपस्थेषु पर्वतेषु हिमपातकारणात् श्रीकेदारनाथे शीतं प्रवर्तते। अद्यैव भगवतः केदारनाथस्य चल-विग्रह-पञ्चमुखी-डोली सेनायाः वाद्यवृन्दस्य भक्तिमयीभिः ध्वनिभिः समारोहपूर्वकं ‘जय श्री केदार’ इति उद्घोषैः सह प्रथमविश्रामस्थलं रामपुरं प्रति प्रस्थिता अभवत्।
प्रमुखाः बिन्दवः –
पञ्चमुखी-डोल्याः यात्राक्रमः: बी.के.टी.सी.-मीडिया-प्रभारी डॉ. हरीशगौड़महोदयेन सूचितं यत् १२ नवम्बर दिनाङ्के गुरुवासरे पञ्चमुखी-डोली विश्वनाथमन्दिरं गुप्तकाशीं प्राप्स्यति तथा च १३ नवम्बर दिनाङ्के शुक्रवासरे शीतकालीन-गद्दीस्थलं श्रीओंकारेश्वरमन्दिरम् उखीमठं प्राप्स्यति। तेन उक्तं यत् कपाटपिधानप्रक्रियायाः अन्तर्गतं विगतशनिवासरे ७ नवम्बर दिनाङ्के भगवतः केदारनाथस्य रक्षकस्य श्रीभकुण्टभैरवनाथस्य कपाटानि शीतकालाय पिहितानि अभवन्।
कपाटपिधानस्य धार्मिकप्रक्रिया: भ्रातृद्वितीयायाः अवसरे श्रीकेदारनाथमन्दिरं प्रातः सार्धत्रिवादने (३:३० वादने) श्रद्धालुनां दर्शनार्थम् उद्घाटितम्। पञ्चवादने कपाटपिधानस्य प्रक्रिया आरब्धा। अर्चकेन टी. गङ्गाधरलिङ्गमहोदयेन धर्माधिकारिणाम् आचार्य-वेदपाठिनाम् उपस्थितौ भगवतः केदारनाथस्य स्वयम्भू-शिवलिङ्गाय शृङ्गाररूपात् समाधिरूपं प्रदत्तम्। स्थानीयपुष्पैः ब्रह्मकमलैः भस्मना च शिवलिङ्गम् आच्छादितम्। तदनन्तरं गर्भगृहस्य कपाटानि पिहितानि अभवन् तथा च भगवतः पञ्चमुखी-डोली सभामण्डपात् बहिः मन्दिरपरिसरम् आगता। अस्मिन् अवसरे सम्पूर्णः मन्दिरपरिसरः ‘जय श्री केदार’ ‘ॐ नमः शिवाय’ इति उद्घोषैः गुञ्जितः अभवत्। सार्धाष्टवादने मुख्यमन्दिरस्य कपाटानि पिहितानि जातानि।
प्रमुखोपस्थितिः: अस्मिन् अवसरे बी.के.टी.सी.-उपाध्यक्षः विजयकप्रवाणः, जिलाधिकारी विशालमिश्रः, सदस्याः महेन्द्रशर्मा, देवीप्रसाददेवली, नीलमपुरी, प्रह्लादपुष्पवाणः, डॉ. विनीतपोस्ती, केदारसभा-अध्यक्षः राजकुमारतिवारी, मुख्यकार्याधिकारी सोहनसिंहराङ्गड़ः, मुख्यप्रभारी-अधिकारी विपिनतिवारी, मुख्यप्रशासनिक-अधिकारी डी.एस. भुजवाणः सहितं जिलाप्रशासनस्य, आरक्षिबलस्य, आई.टी.बी.पी., एस.डी.आर.एफ. इत्यादीनाम् अधिकारिणः सैनिकाः च उपस्थिताः आसन्।