औद्योगिक-निर्माण-अपशिष्टानां पुनः उपयोगाय संयुक्तप्रौद्योगिक्याः विकासे भारत-नॉर्वे-देशयोः मध्ये संवादः

औद्योगिक-निर्माण-अपशिष्टानां पुनः उपयोगाय संयुक्तप्रौद्योगिक्याः विकासे भारत-नॉर्वे-देशयोः मध्ये संवादः
नवदेहलीभारत-नॉर्वे-देशाभ्यां ‘फ्लाई ऐश’ (उड्डयन-भस्म), ‘स्टील स्लैग’ (लौह-किट्टम्), ‘रेड मड’ (रक्तपङ्कः) तथा च निर्माण-विध्वंस-कार्येभ्यः निर्गतानाम् अवकराणां (मलबा) संसाधनं कृत्वा मार्गनिर्माण-सामग्री, ‘जियोपॉलीमर कंक्रीट’ इत्यादीनि उपयोगिनि निर्माण-उत्पादानि सज्जीकर्तुं संयुक्तप्रौद्योगिक्याः विकासस्य सम्भावनानां विषये विचारविमर्शः कृतः अस्ति।
वैज्ञानिक-औद्योगिक-अनुसन्धान-परिषदा (सी.एस.आई.आर.) नॉर्वे-देशस्य अनुसन्धान-संस्थानेन ‘सिन्टेफ’ (SINTEF) तथा च नॉर्वे-देशस्य अनुसन्धान-परिषदा सह मिलित्वा अत्र ‘सीमेण्ट-निर्माण-क्षेत्रे अपशिष्टात् संसाधन-समाधानम्’ इति विषये भारत-नॉर्वे-संवादस्य आयोजनं कृतम्। अस्मिन् संवादे सी.एस.आई.आर.-संस्थायाः विविधानां प्रयोगशालानां प्रतिनिधयः, नॉर्वे-देशस्य वैज्ञानिकाः, नियामकसंस्थाः तथा च सीमेण्ट-निर्माण-उद्योगस्य प्रतिनिधयः सहभागिनः अभवन्।
संवादस्य प्रमुखाः उद्देश्याः बिन्दवः च –
संयुक्त-अनुसन्धानं प्रौद्योगिकी-सहयोगः च: आधिकारिकसूचनानुसारम् अस्य संवादस्य उद्देश्यम् औद्योगिक-निर्माण-अपशिष्टानां पुनः उपयोगः, तेषां सतत-प्रबन्धनं तथा च तेभ्यः उपयोगिनः निर्माणसामग्र्याः निर्माणार्थं संयुक्त-अनुसन्धानस्य प्रौद्योगिकी-सहयोगस्य च सम्भावनानाम् अन्वेषणम् आसीत्।
हरित-रणनीतिक-सहभागिता: इयं पहलः भारत-नॉर्वे-देशयोः मध्ये ‘हरित-रणनीतिक-सहभागितायाः’ (ग्रीन स्ट्रैटेजिक पार्टनरशिप) अन्तर्गतं चक्रीय-अर्थव्यवस्थां, स्वच्छप्रौद्योगिकीम् अनुसन्धानसहयोगं च वर्धयितुं सम्बद्धा अस्ति।
चुनौतीनां समाधानं च विचारः: चर्चायां निर्माण-विध्वंस-अवशिष्टानां, स्टील स्लैग, फ्लाई ऐश, रेड मड इत्यादीनाम् औद्योगिक-अवशेषाणां प्रयोगः मार्गनिर्माणे, कंक्रीट-निर्माणे अन्यनिर्माणसामग्रीषु च कर्तुं सम्भावनासु विचारः कृतः। एतदतिरिच्य, एतेषाम् अपशिष्टानां प्रसंस्करणे, तकनीकी-मानकेषु, आर्थिक-व्यवहार्यतायां तथा च आपणेषु (बाजार) स्वीकार्यतायां विद्यमानानां चुनौतीनां विषये अपि गहनं चिन्तनम् अभवत्।