क्रीडा-मञ्चानां माध्यमेन बालकान् यूनश्च लक्ष्यीकुर्वन्ति आतङ्किनः; संयुक्तराष्ट्र-प्रतिवेदने प्रकटनम्
हिमसंस्कृतवार्ता — न्यूयोर्क:।
संयुक्तराष्ट्र-सुरक्षा-परिषदः आतङ्कवाद-विरोधी-समित्याः कार्यकारी-निदेशालयेन (CTED) प्रकाशितेन एकेन नूतनेन प्रतिवेदनेन स्पष्टीकृतं यत् आतङ्कवादी-समूहाः अधुना बालकान् यूनश्च स्व-जाले पातयितुं क्रीडा-मञ्चानां, वीभत्स-हिंसक-सामग्र्याः, नकारवादि-अन्तर्जाल-उपसंस्कृतेश्च आश्रयं गृह्णन्ति।
“सन्देश-प्रेषणात् परम्- कार्यात्मक-आधारभूत-संरचनात्वेन आतङ्कवादी-दुष्प्रचारः” (Beyond Messaging: Terrorist Propaganda as Operational Infrastructure) इति शीर्षकेण प्रकाशिते अस्मिन् प्रतिवेदने विज्ञापितं यत् आतङ्कवादी-सङ्घटनानि नूतन-सदस्यानां संयोजनाय, कट्टरता-प्रसाराय, धन-सङ्ग्रहणाय, रणनीतिक-योजनाभ्यः, स्व-प्रभाव-क्षेत्रेषु शासन-गतिविधीनां दृढीकरणाय च दुष्प्रचारस्य व्यापकम् उपयोगं कुर्वन्ति। प्रतिवेदनानुसारम् एते समूहाः अस्य दुष्प्रचारस्य उपयोगं केवलं सञ्चार-माध्यमत्वेन न कुर्वन्ति, अपि तु स्व-अभियानानां प्रमुख-आधारभूत-संरचना-रूपेण कुर्वन्ति।
अन्तर्जाल-मञ्चेषु वर्धते चरमपन्थि-चिन्तनम्
प्रतिवेदने प्रतिपादितं यत् युवा-सन्ततेः मस्तिष्के प्रभावम् उत्पादयितुं क्रीडा-मञ्चातिरिच्य अन्तर्जाल-पर्यावरणे (Online Ecosystem) हिंसक-चरमपन्थि-विचारधाराणां समन्वयः, तान्त्रिक-लैङ्गिक-हिंसा, महिला-विरोधि-मञ्चानां च दुरुपयोगः महती चिन्तायाः विषयः सञ्जातः अस्ति। विशेषतया आफ्रिका-देशेषु तथा मध्य-दक्षिण-एशिया-क्षेत्रेषु सक्रियाः आतङ्कि-गुल्माः स्थानीय-समस्यानाम् अनुचित-लाभं स्वीकर्तुं, स्वस्य प्रामाणिकतां साधयितुं, धन-सङ्ग्रहं विधातुं च अस्य दुष्प्रचारस्य आश्रयं लभन्ते।
निदेशालयेन सचेतितं यत् आतङ्कि-समूहानां द्रुतगत्या परिवर्तमानानां पद्धतीनां तथा च सदस्य-देशानां, वैधानिक-तन्त्राणां, अङ्कीय-मञ्चानां च प्रतिक्रि या-क्षमतायाः मध्ये महत् ‘अन्तरं’ समुत्पन्नम् अस्ति। प्रतिवेदने अस्य उपरि बलं दत्तं यत् अन्ताराष्ट्रिय-मानवाधिकार-नियमानां परिधौ स्थित्वा आतङ्कवाद-विरोधी-प्रयासेषु दुष्प्रचारः केवलं पाठ्य-सामग्री न मन्तव्यः, अपि तु आतङ्कवादस्य प्रमुख-सञ्चालक-रूपेण मत्वा अस्य निवारणं कर्तव्यम्।
