*बाहिरखण्डवैदिकसंस्कृतविद्यापिठे संस्कृतसप्ताहमहोत्सवः हर्षोल्लासेन समाचरितः *
अद्य संस्कृतसप्ताहमहोत्सवस्य चतुर्थदिने पश्चिमबङ्गप्रदेशस्य हूगलीमण्डले स्थिते वैदिकसंस्कृतविद्यापीठे, बाहिरखण्डे श्रावणपूर्णिमोत्सवः श्रद्धया हर्षोल्लासेन च समाचरितः।
कार्यक्रमे श्रीसीतारामवैदिकादर्शसंस्कृतमहाविद्यालयस्य प्राचार्यः डॉ. सोमेशकुमारमिश्रः तथा अन्ये आचार्याः उपस्थिताः आसन्। तत्रत्यैः आचार्यैः, विद्यार्थिभिः तथा उपस्थितैः भक्तजनैः सह श्रावणपूर्णिमायाः पावनं पर्व श्रद्धापूर्वकं समाचरितम्।
कार्यक्रमस्य प्रमुखाकर्षणं तत्रत्यस्य महास्वामिनः संस्कृतेन प्रदत्तम् आशीर्वचनम् आसीत्। महास्वामिना संस्कृतभाषया एव रक्षाबन्धनस्य महत्त्वं प्रतिपादितम्। रक्षाबन्धनं केवलं पारिवारिकस्नेहस्य प्रतीकं न, अपितु भारतीयसंस्कृतेः, परस्परविश्वासस्य, स्नेहस्य च पवित्रं प्रतीकम् इति तेन प्रतिपादितम्। विशेषतः पश्चिमबङ्गप्रदेशे संस्कृतभाषायाः संरक्षणस्य, संवर्धनस्य तथा प्रचारप्रसारस्य आवश्यकता अपि तेन प्रभावपूर्णतया प्रतिपादिता।
तदनन्तरं महाविद्यालयस्य प्राचार्यः डॉ. सोमेशकुमारमिश्रः संस्कृतभाषायाः महत्त्वं, तस्याः प्राचीनता, वैज्ञानिकता, भारतीयज्ञानपरम्परायां च तस्याः विशिष्टं स्थानं वर्णितवान्। संस्कृतस्य संरक्षणं केवलं भाषायाः संरक्षणं न, अपितु भारतस्य समृद्धस्य ज्ञानवाङ्मयस्य सांस्कृतिकपरम्परायाश्च संरक्षणम् इति सः अवदत्।
कार्यक्रमस्य समग्रसमन्वयं डॉ. शान्तनुकुमारचक्रवर्तिवर्यः कुशलतया कृतवान्। तस्य समन्वयेन कार्यक्रमः सुव्यवस्थितरूपेण सफलतया च सम्पन्नः।
अन्ते उपस्थितैः सर्वैः संस्कृतभाषायाः संरक्षणाय, संवर्धनाय, प्रचारप्रसाराय च सामूहिकरूपेण प्रयत्नः करणीयः इति संकल्पः कृतः। एवं संस्कृतसप्ताहमहोत्सवस्य चतुर्थदिवसः श्रावणपूर्णिमायाः पावनतया, संस्कृतभाषायाः गौरवेन च परिपूर्णः सन् सफलतया सम्पन्नः।
