हमटायां (मनाली) चतुर्विंशतिवर्षानन्तरं भगवान् श्रृङ्गिऋषिमहाराजस्य महर्षेः जमदग्नेः (जमलूदेवस्य) च दिव्य-महासमागमः सम्पन्नः

हमटायां (मनाली) चतुर्विंशतिवर्षानन्तरं भगवान् श्रृङ्गिऋषिमहाराजस्य महर्षेः जमदग्नेः (जमलूदेवस्य) च दिव्य-महासमागमः सम्पन्नः
हिमसंस्कृतवार्ता:- रूपेन्द्र वशिष्ठ:। हमटायाः पुण्यभूमौ एकं दिव्यम् अलौकिकं च दृश्यं साकारमभवत्। चतुर्विंशतिवर्षाणां दीर्घान्तरालानन्तरं श्रद्धाकेन्द्रभूतयोः भगवतः श्रृङ्गिऋषिमहाराजस्य, महातपस्विनः महर्षेः जमदग्नेः (जमलूदेवस्य) च दिव्य-महासमागमः सम्पन्नः। अस्य ऐतिहासिकस्य आध्यात्मिकस्य च अस्य महोत्सवस्साय साक्षीभवितुं पञ्चकोठीक्षेत्रात्, चतुर्विंशतिकोठी-सराजक्षेत्राच्च सहस्रशः श्रद्धालवः समागताः।
पौराणिकप्रसङ्गः- आसुरीशक्तीनां विनाशः धर्मस्य च प्रतिष्ठापनम्
पुरातनजनश्रुतिषु प्रसिद्धम् अस्ति यत् आदिकाले अस्यां उपत्यकायाम् आसुरीशक्तीनाम् अत्याचारः वर्धितः। तदा परमसिद्धौ महर्षिः श्रृङ्गिः- महर्षिः जमदग्निः अनयो: स्वीयतपोबल-मन्त्रशक्तिभ्यां ताः दुष्टशक्तीः समूलं विनाश्य धर्मस्य, सत्यस्य, लोककल्याणस्य च प्रतिष्ठापनम् अकुरुताम्। तस्यैव दिव्यविजयस्य स्मृत्यर्थम् अद्यापि भगवान् श्रृङ्गिऋषिः स्वीयया अर्धाङ्गिन्या माता शान्तया सह एतां पवित्रां देवयात्रां निर्वहति।
हमटा (मनाली) देवकलायाः आद्युत्पत्तिस्थलम् तथा ‘देवपरामर्शस्य’ महत्त्वम्
लोकपरम्परानुसारं महर्षेः जमदग्नेः देवकलायाः आद्युत्पत्तिस्थलं हमटा एव मन्यते। अत्र अवतीर्य ततः सा देवकला मलाणा-प्रदेशं प्रति प्रस्थिता इति विश्वासः। अतः भगवान् श्रृङ्गिऋषिमहाराजस्य कृते हमटा परमपवित्रं विशेषमहत्त्वयुक्तं च स्थलम् अस्ति। अत्र आगत्य भगवान् स्वगुरमाध्यमेन (देववक्ता) देवपरामर्शं भविष्यवाणीं च प्रददाति। तेन क्षेत्रस्य सुखसमृद्धिः, प्रकृतिसंरक्षणम्, धर्मपालनं समाजस्य च हिताय आवश्यकं मार्गदर्शनं प्रदीयते।
अयं दिव्य-महासमागमः केवलं धार्मिकपरम्परायाः प्रतीकः न, अपि तु हिमाचलप्रदेशस्य समृद्धदेवसंस्कृतेः, लोकश्रद्धायाः सनातनपरम्परायाश्च जीवन्मानं प्रतीकम् अस्ति।