संस्कृतभारत्याः पटियालाविभागस्य परिवारसम्मेलनं सम्पन्नम्।

संस्कृतभारत्याः पटियालाविभागस्य परिवारसम्मेलनं सम्पन्नम्
हिमसंस्कृतवार्ता:- अजय कुमार आर्य, पटियाला
पञ्जाबप्रदेशे उत्तरक्षेत्रसांस्कृतिककेन्द्रस्य परिसरे पटियालाविभागसम्मेलनस्य आयोजनं जातम्, यत्र संस्कृतभारत्याः प्रान्त- क्षेत्र- नगरकार्यकारिणीनां संस्कृतानुरागिपरिवारजनानां च सहभागिता अभवत्। तत्र पञ्जाबस्य अध्यक्षस्य वीरेन्द्रकुमारस्य, मन्त्रिणः अजयकुमार आर्यस्य, प्रान्तप्रचारप्रमुखस्य डॉ. ओमनदीपस्य, पटियालाविभागसंयोजकस्य गगनदीपपाठकस्य, पटियालाजिलामन्त्रिणः रविदत्तवर्यस्य च परिवारजनानां सह सहभागिता अभवत्।
सम्मेलनस्य उद्देश्यानि- अस्य परिवारसम्मेलनस्य अनेकानि उद्देश्यानि आसन्। प्रथमम्, संस्कृतकार्ये संलग्नानां कार्यकर्तॄणां परिवारजनानां च मध्ये परस्परपरिचयः स्नेहसम्बन्धश्च वर्धेत, इति। द्वितीयम्, कार्यकर्तॄणां परिवाराः अपि संस्कृतभारत्याः कार्ये स्वस्य सहभागितां अनुभवेयुः, येन कार्यकर्तृषु उत्साहः वर्धते, परिवारजनाश्च संस्कृतकार्यं स्वकीयं मन्यन्ते। तृतीयम्, विभिन्नस्थानेभ्यः आगतानां कार्यकर्तृपरिवाराणां मध्ये सौहार्दं सहकार्यभावश्च प्रवर्धेत, यतः संस्कृतभाषायाः प्रचारकार्यं दीर्घकालपर्यन्तं निरन्तरं चालयितुं परिवाराणां सहयोगः अत्यावश्यकः भवति।
परिवारेण सह मेलनस्य आवश्यकता-
इत्यनुभूयते यत् संस्कृतकार्यकर्तारः बहुधा स्वकार्ये एव व्यस्ताः भवन्ति, येन परिवारजनैः सह पर्याप्तः समयः न लभ्यते। अतः एतादृशानि सम्मेलनानि कार्यकर्तृभ्यः स्वपरिवारजनैः सह गुणवत्तापूर्णं समयं यापयितुम् अवसरं ददति। यदा परिवारजनाः अपि संस्कृतभारत्याः कार्यक्रमेषु सम्मिलिताः भवन्ति, तदा ते संस्कृतकार्यस्य महत्त्वं गभीरतया अवगच्छन्ति, कार्यकर्तृणां परिश्रमं च सम्यक् जानन्ति। एवं परिवारस्य समर्थनेन कार्यकर्ता उत्साहपूर्वकं दीर्घकालं यावत् कार्ये संलग्नः भवितुं शक्नोति। अस्मिन् सम्मेलने मक्खनलालसिंगलवर्यस्य, मक्खनजैनवर्यस्य, छज्जुराममहोदयस्य च विशेषोपस्थितिः आसीत्।