बिहारराज्ये मुख्यमन्त्री-महिला-वृत्ति-योजनायाः शुभारम्भं अकरोत् प्रधानमन्त्री नरेन्द्रमोदी

बिहारराज्ये मुख्यमन्त्री-महिला-वृत्ति-योजनायाः शुभारम्भं अकरोत् प्रधानमन्त्री नरेन्द्रमोदी । तेनोक्तं यत् महिला-केन्द्रित-योजनाभ्यः सर्वेऽपि वर्गाः लाभान्विताः सञ्जाताः।
हिमसंस्कृतवार्ता: – प्रधानमन्त्री नरेन्द्रमोदी प्रोक्तवान् यत् प्रशासनेन महिला-केन्द्रिताः बहव्यः योजनाः कार्यक्रमाश्च च प्रचालिताः। एतैः कार्यक्रमैः समाजस्य सर्वेऽपि वर्गाः लाभान्विताः सञ्जाताः। बिहारराज्ये मुख्यमन्त्री-महिला-रोज़गार योजनायाः शुभारम्भावसरे नवदिल्लीतः दृश्याङ्कन-माध्यमेन भाषमाणः श्रीमोदी अवदत् यत् केन्द्रसर्वकारः तथैव बिहारस्य मुख्यमन्त्रिणः नीतीश-कुमारस्य सर्वकारश्च एकीभूय महिला कल्याणार्थं कार्यरतौ स्तः। प्रधानमन्त्रिणा समुद्धोषितं यत् अस्याः योजनायाः अन्तर्गतं पञ्चसप्तति-लक्षाधिकाः महिलाः स्ववित्तकोषेषु साक्षात् दशसहस्र-रूप्यकाणां लाभं अवाप्नुवन्। तेनोदीरितं यत् अस्याः योजनायाः आधारः एकादश-वर्षेभ्यः पूर्व प्रधानमन्त्री जनधन-योजना-माध्यमेन प्रतिष्ठापितः। सः सबलं प्रोक्तवान् यत् भ्रष्टाचारं विना साहाय्यराशिः साक्षात् महिलानां वित्तकोषेषु प्रेष्यते। मुख्यमन्त्री-महिला-रोज़गार-योजनां नवरात्रस्य उपहारत्वेन प्रतिपादयता प्रधानमन्त्रिणा विश्वासः प्रकटितः यत् द्विशक्ति-शासनस्य प्रयासेन बिहारे लखपति-स्वसृणां अधिकतमा संख्या भविष्यति। प्रधानमन्त्रिणा प्रोक्तं यत् केन्द्र-सर्वकारः त्रिकोटि-महिला उद्यमिनां निर्माणार्थं कृतसंकल्पो वर्तते। अत्रावधेयं यत् एतासु द्विकोट्यधिकाः महिलाः अस्मिन् क्षेत्रे निर्मिताः येन समाजे परिवारे च बृहद्-परिवर्तनं समुत्पन्नम्। श्रीमोदिना विज्ञापितं यत् मुद्रा ड्रोन दीदी बीमा सखी बैंक सखी इत्येताः योजनाः उद्यमावसराणां विस्तारं कुर्वन्ति। जनधन योजनान्तर्गतं त्रिंशत् कोट्यधिकानां महिलानां वित्तकोषाः उद्घाटिताः, सहैव एते कोषाः आधार-सङ्ख्यया दूरवाणी-सङ्ख्यया च संलग्नाः सन्ति।