भारत-यू.के. इत्येतौ देशौ ऐतिहासिके मुक्तव्यापारसमन्वये हस्ताक्षरं कृतवन्तौ

भारत-यू.के. इत्येतौ देशौ ऐतिहासिके मुक्तव्यापारसमन्वये हस्ताक्षरं कृतवन्तौ; प्रधानमन्त्रिणा नरेन्द्रमोदिना कथितं यत्, समन्वयमिदं उभयराष्ट्रयोः संयुक्त-समृद्धेः मार्गम् प्रशस्तं करोति ।
हिमसंस्कृतवार्ता: – भारत-ब्रिटेन देशौ ऐतिहासिक-पदक्षेपम् अनुसरन्तौ स्वतन्त्रव्यापारसन्धौ हस्ताक्षरं कृतवन्तौ। चेकर्स इत्यत्र स्वकीयेन ब्रिटिश-समकक्षीयेण कीर-स्टार्मर इत्यनेन सह वार्ताहरसम्वादे प्रदत्ते वक्तव्ये प्रधानमन्त्रिणा नरेन्द्रमोदिना कथितं यत् भारत-ब्रिटेनदेशयोः द्विपाक्षिकसम्बन्धानाम् ऐतिहासिकः दिवसः अस्ति । सः प्रसन्नतां प्रकटितवान् यत् अनेकवर्षाणाम् परिश्रमस्य अनन्तरं द्वयोः राष्ट्रयोः मध्ये समग्र-आर्थिक-व्यापार-सन्धिः अभवत् । सः अवोचत् यत् एषा सन्धिः भारत-ब्रिटेन-देशयोः संयुक्त-समृद्धेः मार्गम् प्रशस्तं करोति । सः प्रोक्तवान् यत् भारतीयवस्त्राणि, पादत्राणानि, रत्र-आभूषणानि, समुद्रजातानि खाद्यानि,अभियान्त्रिक-वस्तूनि च ब्रिटेनदेशे उत्तमविपणनावसरान् प्राप्स्यन्ति । सः अकथयत् यत् इयं सन्धिः भारतस्य यूनां, कृषकाणां, मत्स्यपालकानां, एम्.एस्.एम्. ई. इति क्षेत्राणां कृते च विशिष्टरूपेण लाभप्रदा भविष्यति । ब्रिटेन-देशस्य प्रधानमन्त्री कीर-स्टार्मरः अवदत् यत्, मुक्तव्यापार-सन्धिः बृहत्तमा आर्थिकदृष्ट्या च महत्वपूर्णा अस्ति । सः प्रधानमन्त्रिणे मोदिने तस्य नेतृत्वस्य व्यावहारिकतायाः च कृते धन्यवादं प्रायच्छत् ।