CM Sukhu : अग्रिमे आय-व्ययके विशेषबालानां कल्याणाय नूतना योजना आनेष्यति सर्वकारः- मुख्यमंत्री सुखविन्दरसिंहसुक्खुः
हिमसंस्कृतवार्ता: – शिमला।
मुख्यमन्त्री सुखविन्दरसिंहसुक्खुः शिमलामण्डलस्य हीरानगरे ६.६७ कोटिरूप्यकाणां व्ययेन निर्मितस्य बौद्धिकदिव्याङ्गबालानां कृते विशेष- आवासीय- विद्यालयस्य उद्घाटनं कृतवान्। मुख्यमन्त्री उक्तवान् यत् राज्ये एतादृशः प्रथमः विशेषः आवासीयः विद्यालयः अस्ति यः ६-१८ वर्षाणाम् आयुवर्गस्य बौद्धिकरूपेण दिव्याङ्गबालानां कृते निर्मितः अस्ति। सः अवदत् यत् बौद्धिकरूपेण दिव्याङ्गबालानां कृते आवासीयसुविधाभिः सह निःशुल्कगुणात्मक- शैक्षिकव्यावसायिकशिक्षणं प्रदातुं राज्ये एषा प्रथमा संस्था अस्ति। विद्यालयखण्डे सङ्गणकप्रयोगशाला, संगीतकक्षः, बहुउद्देश्यकः सभागार:, छात्रावासखण्डे ५० बालकानां कृते छात्रावासः चिकित्साकक्षः, कर्मचारिणां कृते आवासीयसुविधाः च सन्ति।
सुखविन्दरसिंहसुक्खुः उक्तवान् यत् वर्तमानस्य राज्यसर्वकारस्य प्रयत्नेन हिमाचलप्रदेशः देशस्य प्रथमं राज्यं जातम् यत् निर्धनबालानां सम्यक् परिचर्यायाः शिक्षायाः च विधानम् अङ्गीकृतवान्। राज्यसर्वकारेण मुख्यामन्त्री सुख-आश्रययोजना आरब्धा, तान् ‘राज्यस्य बालकाः’ इति स्वीकृतम् अस्ति। एतेषां बालकानां शिक्षाव्ययस्य अतिरिक्तं राज्यसर्वकारः तेषां कोषधनस्य कृते प्रतिमासं चतुर्सहस्ररूप्यकाणि प्रददाति इति सः अवदत्। सः अवदत् यत् मुख्यमन्त्री सुख-आश्रययोजनायाः अन्तर्गतं विगतवर्षद्वये राज्ये ३८.५० कोटिरूप्यकाणां लाभाः प्रदत्ताः। सः अवदत् यत्, “राज्यसर्वकारस्य प्रथमे आय-व्ययके मुख्यमन्त्री सुखाश्रय-योजना आरब्धा। द्वितीये आय-व्ययके राज्यस्य विधवाबालानां २३ सहस्राणां शिक्षायाः सम्पूर्णं व्ययम् राज्यसर्वकारेण वोढुं प्रावधानं कृतम् अस्ति। तृतीये आय-व्ययके बौद्धिकरूपेण दिव्याङ्गबालानां कृते विस्तृतयोजनायाः प्रावधानं भविष्यति। अस्य कृते एतेषां बालकानां शिक्षकैः सह अपि चर्चा भविष्यति, येन तेषां आवश्यकताः योजनायां समाविष्टाः भवेयुः।
मुख्यमन्त्री उक्तवान् यत् राज्यसर्वकारस्य सामाजिकसुरक्षाक्षेत्रे विशेषं ध्यानं वर्तते तथा च एतत् दृष्ट्वा सोलनमण्डलस्य कण्डाघाटे नवसहस्रदिव्याङ्गजनानाम् उच्चशिक्षाप्रदानार्थं उत्कृष्टताकेन्द्रस्य स्थापना क्रियते, यस्य निर्माणं वर्षद्वये सम्पन्नं भविष्यति। सः अवदत् यत् राज्यसर्वकारः दिव्याङ्गजनानाम् शिक्षणाय प्रशिक्षणाय च निरन्तरं प्रयत्नान् कुर्वन् अस्ति येन तेभ्यः समाजे सम्माननीयं स्थानं प्रदातुं शक्यते। राज्यसर्वकारः मण्डीमण्डलस्य सुन्दरनगरे, काङ्गड़ामण्डलस्य लुथाने च ९२.३३ कोटिरूप्यकाणां व्ययेन ४०० आश्रितानाम् आवासीयक्षमतायुक्तानां मुख्यमन्त्री आदर्शग्राम- सुखाश्रयसङ्कुलानां निर्माणं कुर्वन् अस्ति।
