लोसरपर्वणि परोक्ष्यते हिमाचलीव्यञ्जनानि, धर्मशालाया: मैक्लोड़गञ्जे आचर्यते नववर्षम्, अद्यारभ्य: पूजा-अर्चना
हिमसंस्कृतवार्ता- कार्यालयीय: प्रतिनिधि:।
बौद्धपञ्चाङ्गानुसारं लोसरपर्वण: अथवा नववर्षस्य अवसरे मुख्यबौद्धमन्दिरस्य मैक्लोड़गञ्जे प्रथमवारं हिमाचलीव्यञ्जनानाम् आयोजनं भविष्यति। तिब्बतीसमुदायस्य लोसर (नववर्षस्य) उत्सवस्य आरम्भः १० फरवरी शनिवासरे भविष्यति। त्रिदिवसीयस्य उत्सवस्य आरम्भः मैक्लोड़गञ्जस्य ला- ग्यारी-बौद्धमठे विशेषपूजा-अर्चना भविष्यति। तिब्बती-पञ्चाङ्गानुसारं एतत् २१५१तमं वर्षम् अस्ति। एतेन सह मुख्यबौद्धमन्दिरस्य मैक्लोड़गञ्जे फरवरीमासे १३ दिनाङ्के लोसरमहोत्सवस्य अवसरे भारतात् विदेशात् च आगच्छन्ता: पर्यटकाः स्थानीयतिब्बतीजनाः च प्रथमवारं हिमाचलीव्यञ्जनानाम् स्वादं प्राप्स्यन्ति। धर्मशाला- मैक्लोड़गञ्जयोः विपणीषु तिब्बतीसमुदायस्य नववर्षस्य (लोसरस्य) विषये बहु उत्साहः वर्तते। तिब्बतीसमुदायस्य जनाः स्वगृहाणां सौन्दर्यीकरणे व्यस्ताः सन्ति।
अस्मिन् अवसरे तिब्बतीसमुदायस्य जनाः पारम्परिकवस्त्रधारिणः परस्परं मिलित्वा अभिनन्दनं कुर्वन्ति। लोसरस्य विषये तिब्बतीसमुदाये बहु उत्साहः आसीत्। लोसरस्य कृते तिब्बतीजनाः पूर्वमेव स्वगृहाणि स्वच्छं कृत्वा वर्णं कुर्वन्ति। एतदतिरिक्तं नववर्षस्य कृते विविधानि मिष्टान्नानि इत्यादयः अपि निर्मीयन्ते। प्रबंधन- अधिकारी कुंचॉग मिगमर: अवदत् यत् महोत्सवात् पूर्वं केन्द्रीयतिब्बतीप्रशासनस्य (सीटीए) कर्मचारिभिः सम्पूर्णे मण्डले मुख्यसर्वकारीकार्यालयेषु मिष्टान्नं वितरितम्। तिब्बतीसमुदायस्य जनाः प्रथमं स्वदेवतायाः कृते छाङ्गं अर्पयन्ति, ततः परस्परं वा बन्धुभिः वा तस्य आदानप्रदानं कुर्वन्ति।
