सेनायाः उपरि टिप्पण्या क्रुद्धः प्रतिपक्षः, उद्घोषणं कृत्वा सदनात् कृतं बहिर्गमनम्, उक्तम्—क्षमां याचेत् जगतसिंहनेगी
हिमसंस्कृतवार्ता — धर्मशाला।
हिमाचलप्रदेश-विधानसभायाम् ‘ऑपरेशन-सिन्दूर’, ‘राफेल-व्यवहारे’, भारतीयसेनायां च मन्त्रिणः जगतसिंहनेगी-महोदयस्य टिप्पणीम् अधिकृत्य गुरुवासरे तीव्रः कोलाहलः अभवत्। मन्त्रिणः वक्तव्येन रुष्टाः प्रतिपक्षस्य भाजपा-विधायकाः सदने उद्घोषणम् अकुर्वन् तथा च विरोधं प्रकटयन्तः सदनात् बहिर्गमनं (वॉकआउट्) कृत्वा बहिः आगतवन्तः। प्रतिपक्षनेता जयरामठाकुरः मन्त्रिणः उपरि भारतीयसेनायाः अपमानं कर्तुम् आरोपम् आरोपयन् तस्मात् सदने क्षमायाचनायाः याचनाम् अकरोत्।
जयरामठाकुरः अवदत् यत् मन्त्री जगतसिंहनेगी गतेभ्यः चतुःपञ्चदिनेभ्यः निरन्तरं विवादास्पद-वक्तव्यानि ददाति। तेन आरोपः आरोपितः यत् मन्त्री अधुना सर्वकारस्य नियन्त्रणात् बहिः गतः अस्ति। संवैधानिकदायित्वं निर्वहन्तः मन्त्रिणः पक्षतः देशस्य सेनायाः विरुद्धं पुनः पुनः टिप्पणीं कर्तुं दुर्भाग्यपूर्णम् अस्ति।
सः प्रावोचत् यद् ‘ऑपरेशन-सिन्दूर’ इत्यस्य अन्तराले राफेल-विमानानां भूमिकां व्यवहारं च अधिकृत्य मन्त्रिणा भ्रष्टाचारस्य आरोपाः आरोपिताः। प्रतिपक्षस्य पक्षतः भारतीयसेनायाः कार्यविधे: उल्लेखं कृते सति मन्त्रिणा तादृशी टिप्पणी कृता, यां भाजपा-दलं सेनायाः अपमानं निर्दिष्टवान् अस्ति। जयरामठाकुरः अवदत् यत् भारतीयसेनायाः बलेन देशः सुरक्षितः वर्तते। सेनया पाकिस्तानाय समुचितं प्रत्युत्तरं दत्तम् अस्ति तथा च समग्रविश्वे तस्याः सम्मानः वर्धितः अस्ति। एतादृश्यां स्थितौ विधानसभा-सदृशे गरिमामये सदने सेनायाः भूमिकायाम् अनेन प्रकारेण टिप्पणी स्वीकर्तुं न शक्यते।
सः अवदत् यत् विधानसभाध्यक्षात् मन्त्रिणः विवादास्पदटिप्पणीं सदनस्य कार्यविधे: निष्कासयितुं याचना कृता अस्ति। मुख्यमन्त्रिणः अपि प्रश्नः कृतः यत् सेनायाः विरुद्धं पुनः पुनः वक्तव्यदानस्य अनन्तरमपि मन्त्री मन्त्रिमण्डले किमर्थं स्थापितः अस्ति? भाजपा-दलस्य याचना अस्ति यत् जगतसिंहनेगी सदने क्षमां याचेत् तथा तस्य विवादास्पदटिप्पणी कार्यविधे: निष्कास्यताम्। क्षमायाचनाम् अकृते सति प्रतिपक्षः इमं विषयं पुनः सदने उत्थापयिष्यति।
