निम्नस्तरस्य औषधीनां निर्मातॄणां विरुद्धं भविष्यति कठोरा कार्यविधि:, सर्वकारेण निर्गमिताः दिशानिर्देशाः
हिमसंस्कृतवार्ता — धर्मशाला।
मुख्यमन्त्री सुखविन्दरसिंहसुक्खू-महोदयः प्रदेशे कृत्रिम-निम्नस्तरीय-औषधीनां निर्माणम् आपूर्तिं च अधिकृत्य कठोरं पक्षं स्वीकुर्वन् अवदत् यत् ईदृशे व्यवसाये संलग्नानां जनानां विरुद्धं कठोरं कार्याचरणं भविष्यति। अस्मिन् सम्बन्धे प्रदेशसर्वकारेण आवश्यकाः दिशानिर्देशाः निर्गमिताः सन्ति। केन्द्रस्तरे अपि सम्बद्धाधिकारिणः कार्यविधये कथिताः सन्ति।
सः प्रावोचत् यत् सर्वकारीयचिकित्सालयेषु रुग्णेभ्यः गुणवत्तापूर्णानि औषधानि उपलब्धं कारयितुं सर्वकारस्य प्राथमिकता वर्तते। श्रीसुक्खू-महोदयः सूचितवान् यत् औषधीनां क्रयणे गुणवत्तां निश्चेतुं पञ्चशतकोटि-रूप्यकेभ्यः (५०० कोटि) अधिकस्य वार्षिकव्यापारस्य (कारोबारस्य) संस्थानां नियम: स्थापित: आसीत्, किन्तु लघु-औषध-आपूर्तिकर्तॄणाम् उच्चन्यायालयं गमनानन्तरं न्यायालयेन अस्मिन् नियमे स्थगनम् आरोपितम् अस्ति। सः अवदत् यत् औषधीनां गुणवत्तायाः साक्षात् सम्बन्धः जनानां स्वास्थ्येन सह अस्ति तथा सर्वकारः अस्मिन् प्रकरणे किमपि सामञ्जस्यं (समझौता) न करिष्यति।
इन्दिरागान्धी-महोदयायै विधानसभा-परिसरे श्रद्धांजलिः

विधानसभाया: शीतकालीने सत्रे धर्मशालायां पूर्वप्रधानमन्त्रिण्याः स्वर्गीयायाः इन्दिरागान्धी-महोदयायाः जयन्त्याम् अवसरे बुधवासरे विधानसभा-परिसरे धर्मशालायां श्रद्धांजलि-कार्यक्रमः आयोजितः। अस्मिन् अन्तराले मुख्यमन्त्री ठाकुर-सुखविन्दरसिंहसुक्खूः, विधानसभाध्यक्षः सहितम् अन्ये च गणमान्यजनाः इन्दिरागान्धी-महोदयायै श्रद्धासुमनानि अर्पितवन्तः।
मुख्यमन्त्री सुखविन्दरसिंहसुक्खूः अवदत् यत् देशस्य एकतायै अखण्डतायै च इन्दिरागान्धी स्वकीयं सर्वोच्चं बलिदानं दत्तवती। देशस्य निर्माणे तस्याः ऐतिहासिकनिर्णयाः योगदानं च सदैव स्मरिष्यन्ते। १९७१ तमे वर्षे तस्याः नेतृत्वे बाङ्ग्लादेशस्य निर्माणम् अभवत्। एतदतिरिच्य तया राजसंस्थानानां शासकानां विशेषाधिकारान् समापयितुं तथा भूमिसीमा-विधानं (लैण्ड् सीलिङ्ग् एक्ट्) प्रवर्तयितुं सदृशाः महत्त्वपूर्णाः निर्णयाः स्वीकृताः। दृढ-इच्छाशक्तेः साहसिकनेतृत्वस्य च कारणादेव सा ‘लौहमहिला’ (आयरन् लेडी) इति नाम्ना ज्ञायते।
लडभड़ोल-दुर्घटनायां शोकः
मुख्यमन्त्री मण्ड्यां सञ्जातायां दुर्घटनायां दुःखं प्रकटयन् प्रभावितपरिवारान् प्रति संवेदनां प्रकाशितवान्। सः अवदत् यत् सन्तानस्य नाशस्य दुःखं पित्रोः कृते असहनीयं भवति। अस्यां दुःखस्य घट्यां प्रदेशसर्वकारः पीडितपरिवारै: सह स्थितः अस्ति तथा नियमानुसारं सर्वा सम्भवा सहायता प्रदास्यते।
