भव्यया शोभायात्रया अन्ताराष्ट्रिय-रेणुका-मेलापकः आरब्धः, सहस्रशः जनाः अभवन् मातृ-पुत्रयोः मिलनस्य साक्षिणः

हिमसंस्कृतवार्ता — नाहनम्।
हिमाचलप्रदेशस्य समृद्धलोकसंस्कृतेः प्रतीकः अन्ताराष्ट्रिय-रेणुका-मेलापकः (मेला) गुरुवासरे आरब्धः अभवत्। उपमुख्यमन्त्री मुकेश-अग्निहोत्री भव्यया शोभायात्रया सह मेलापकस्य विधिवत् शुभारम्भम् अकरोत्। सः देवशिविकान स्कन्धे धृत्वा प्रस्थापितवान् तथा च शोभायात्रायाः नेतृत्वमपि अकरोत्। शोभायात्रा अपराह्णे ददाहू-स्थिते क्रीडाङ्गणे आरब्धा। इयं ददाहू-विपणी (बाजार), गिरिपुलं, बेडोन-स्थलं, देवशिलां मेलापक-प्राङ्गणं च अतिक्रम्य अगच्छत्।
सायङ्कालात् पूर्वं शोभायात्रा रेणुकाजी-तीर्थस्य त्रिवेणीघट्टं प्राप्तवती। तत्र मातुः रेणुकायाः पुत्रस्य परशुरामस्य च पारम्परिकम् आध्यात्मिकं च मिलनं कारितम्। अस्य ऐतिहासिकमिलनस्य सहस्रशः श्रद्धालवः साक्षिणः अभवन्। पारम्परिक-लोकवाद्ययन्त्राणां, शङ्खानां, घण्टानाम्, आनक-दुन्दुभीनां (ढोल-नगाड़ों), वाद्यवृन्दानां च मधुरध्वनिना रेणुका-उपत्यका गुञ्जायमाना अभवत्। भगवतः परशुरामस्य प्राचीनेभ्यः जामू-कटाहा- महासू-मण्डलाह-मन्दिरेभ्यः आगताः रजतजटिताः देवशिविका: आकर्षणस्य केन्द्रम् अतिष्ठन्। श्रद्धालवः देवतानां दर्शनं कृत्वा मनोकामनापूर्त्यर्थं प्रार्थनाः अकुर्वन्।
राजपरिवारेण निर्वहता शताब्दीप्राचीना परम्परा
रेणुका-मेलापकस्य शताब्दीप्राचीनां परम्परां निर्वोढुं राजपरिवारस्य वंशजाः अपि गुरुवासरे ददाहू-स्थलं प्राप्तवन्तः। राजपरिवारस्य वंशजः कँवर-अजयबहादुरसिंहः परम्परागतवेशभूषायां शिविकाया: स्वागतम् अकरोत्। सः परिवारस्य सदस्यैः सह भगवतः परशुरामस्य रजतजटितां शिविकां मण्डपं (पण्डालं) यावत् प्रापितवान्। इदं कार्यं विधिवत् मन्त्रोच्चारणस्य मध्ये सम्पन्नम् अभवत्, यस्मिन् कँवर-अभयबहादुरः, कँवर-हेमन्तसिंहः अन्ये च सदस्याः उपस्थिताः आसन्।
