नैमिषारण्ये संस्कृतसप्ताहस्य शुभारम्भः, क्रीडया संस्कृतशिक्षणम्
हिमसंस्कृतवार्ताः — उत्तरप्रदेशसंस्करणम्।
सीतापुरम्। संस्कृतभारती, सीतापुरस्य तत्त्वावधानेन नैमिषक्षेत्रस्थिते आत्मानन्दसंस्कृतशिक्षणसंस्थाने संस्कृतसप्ताहस्य शुभारम्भः उत्साहपूर्वकं सम्पन्नः। अस्मिन् अवसरे बटुकानां कृते विविधभाषाक्रीडानां माध्यमेन संस्कृतभाषायाः शिक्षणं सहजतया रोचकरूपेण च प्रदत्तम्। क्रीडामाध्यमेन संस्कृतशब्दानां प्रयोगं वाक्यरचनां च ज्ञात्वा विद्यार्थिषु संस्कृतभाषायाः प्रति विशेषः उत्साहः दृष्टः।
कार्यक्रमे संस्कृतभारत्याः कार्यकर्ता अंशुगुप्तः विविधाः भाषाक्रीडाः आयोज्य बालकेभ्यः संस्कृतशब्दानां प्रयोगं तथा सरलवाक्यनिर्माणं च अभ्यासितवान्। तेन ‘मम स्थाने संस्कृतम्’ इति ध्येयवाक्यं प्रतिपाद्य संस्कृतसम्भाषणस्य शिक्षणं तथा दैनिकजीवने संस्कृतभाषायाः प्रयोगं च प्रति विशेषं बलं दत्तम्।
अंशुगुप्तेन उक्तं यत् संस्कृतभारती १९८१ तमवर्षात् निरन्तरं संस्कृतभाषायाः पुनरुज्जीवनाय कार्यं कुर्वती अस्ति तथा देशस्य विभिन्नभागेषु जाति-धर्म-वर्गभेदान् अतिक्रम्य बहूनां जनानां संस्कृतसम्भाषणप्रशिक्षणे योगदानं दत्तवती। तेन प्रतिपादितं यत् क्रीडामाध्यमेन अधिगता भाषा बालकानां मनसि सहजतया स्थिरा भवति। एतेन संस्कृतभाषायाः प्रति विद्यमानः संकोचः दूरीभवति तथा भाषायाः प्रति स्वाभाविकः अनुरागः विकसितः भवति।
कार्यक्रमे शिक्षणसंस्थायाः संस्थापकः आचार्यः सर्वेशशुक्लः अपि उपस्थितः आसीत्। स्वीयाशीर्वचने तेन बटुकान् सम्बोध्य उक्तं यत् संस्कृतं केवलं भाषा नास्ति, अपितु भारतीयसंस्कृतेः संस्काराणां च आत्मा अस्ति। नैमिषारण्ये ऋषिमुनीनां पावनतपःस्थले संस्कृतसप्ताहस्य आयोजनं संस्कृतप्रचारस्य दिशि शुभं संकेतं वर्तते।
तेन संस्कृतभारत्या सञ्चाल्यमानस्य अभियानस्य प्रशंसा कुर्वता उक्तं यत् बाल्यावस्थायामेव बालकेषु संस्कृतभाषायाः प्रति रुचिजननं भाविपीढीं स्वकीयसांस्कृतिकमूलैः संयोजयितुं प्रभावशाली माध्यमं भवति।
संस्कृतसप्ताहस्य अन्तर्गतं आगामीषु दिवसेषु अपि विविधाभिः रोचकाभिः गतिविधिभिः बटुकान् संस्कृतभाषया सह संयोजयितुं प्रयासः निरन्तरं करिष्यते।
