हिमाचलस्य काङ्गड़ा-जनपदे एकोनविंशति-वर्ष-पर्यन्तानां युनां कृते प्रदास्यते कृमिनाशकौषधम्, सज्जीकरणे संलग्नः स्वास्थ्य-विभागः
हिमसंस्कृतवार्ता — काङ्गड़ा।
राष्ट्रिय-कृमि-मुक्ति-दिवसस्य २०२६ सफल-आयोजनाय उपायुक्त-कार्यालये काङ्गड़ा-मण्डल-स्वास्थ्य-विभागेन मण्डल-स्तरीय-कार्यदलस्य (टास्क फोर्स) उपवेशनम् आयोजितम्। उपवेशनस्य अध्यक्षताम् अतिरिक्त-उपायुक्तः काङ्गड़ा विनयकुमारः अकरोत्। राष्ट्रिय-कृमि-मुक्ति-दिवसस्य आयोजनम् १८ सितम्बर दिनाङ्के भविष्यति।
उपवेशने मण्डल-स्वास्थ्य-अधिकारी डॉ. राजेशसूदः, मण्डल-कार्यक्रम-अधिकारी डॉ. दुष्यन्तः, प्रदीपपटियालः, उप-मण्डल-प्रारम्भिक-शिक्षाधिकारी अश्वनीकुमारः, उप-निदेशकः प्रारम्भिक-शिक्षा बलविन्द्रसिंहः सहिताः विविध-विभागानाम् अधिकारिणः उपस्थिताः आसन्।
अतिरिक्त-उपायुक्तेन विनयकुमारेण सर्व-सम्बद्ध-विभागेभ्यः अभियानस्य सफल-सञ्चालनाय परस्पर-समन्वयेन कार्यं कर्तुं निर्देशाः दत्ताः। सः पालकेभ्यः, शिक्षकेभ्यः, बाल-विकास-केन्द्र-कार्यकर्तृभ्यः (आङ्गनवाडी), समुदायस्य सद्स्येभ्यश्च सक्रिय-सहयोगाय न्यवेदयत्।
३.७२ लक्ष-बालकेभ्यः औषध-वितरणस्य लक्ष्यम्
अतिरिक्त-उपायुक्तः विज्ञापितवान् यत् राष्ट्रिय-कृमि-मुक्ति-दिवसे एकात् एकोनविंशति-वर्ष-पर्यन्तस्य (१ तः १९ वर्षाणि) आयु-वर्गस्य बालकेभ्यः विद्यालयानाम् आङ्गनवाडी-केन्द्राणां च माध्यमेन कृमिनाशकम् औषधं प्रदास्यते, यदा च द्वि-तः पञ्च-वर्ष-पर्यन्तस्य बालकेभ्यः ‘विटामिन-ए’ इत्यस्य मात्रा (खुराक) दास्यते। तेन प्रोक्तं यत् प्रशासनस्य एषः यत्नः यत् प्रत्येकः बालकः अस्मिन् अभियाने समाविष्टः भवेत्।
काङ्गड़ा-मण्डले प्रायः त्रि-लक्ष-द्विसप्तति-सहस्र (३,७२,०००) योग्य-बालकेभ्यः कृमिनाशकौषध-प्रदानाय लक्ष्यं निर्धारितम् अस्ति। कृमि-मुक्तिः एका सुरक्षिता प्रभावशालिनी च स्वास्थ्य-योजना अस्ति, या बालकानां पोषणे, रोग-प्रतिरोधक-क्षमतायां, समग्र-विकासे च महद्-योगदानं करोति।
मण्डल-स्वास्थ्य-अधिकारिणा डॉ. राजेशसूदेन सज्जीकरणानां विवरणं दत्तम्। मण्डल-कार्यक्रम-अधिकारिणा डॉ. दुष्यन्तेन उक्तं यत् १८ सितम्बर दिनाङ्के विद्यालय-गामिभ्यः बालकेभ्यः ‘एल्बेन्डाजोल’-औषधस्य मात्रा दास्यते। पञ्च-वर्षेभ्यः न्यून-वयस्केभ्यः बालकेभ्यः ‘विटामिन-ए’ अपि प्रदास्यते। एषा सम्पूर्ण-प्रक्रिया प्रशिक्षित-कर्मचारिणां सम्मुखे सुरक्षा-नियमानां पालनेन सह सम्पन्ना भविष्यति।
