*शिक्षाक्षेत्रे अनुपमं निदर्शनम्: परीक्षायाः अन्तिमदिने एव कुमारभास्करवर्मासंस्कृत-पुरातनाध्ययनविश्वविद्यालयेन परीक्षाफलं घोषितम्*
नलबाडी, २४-०७-२६:
छात्राणां शैक्षणिकभविष्यस्य सुरक्षितीकरणाय नलबाडीस्थितः कुमारभास्करवर्मासंस्कृतपुरातनअध्ययनविश्वविद्यालयः एकं युगान्तकारिणं समयोचितं च पदक्षेपं स्वीकृत्य अनन्यं निदर्शनं प्रस्तुतवान्। शिक्षासुधारस्य अभिनवप्रयासरूपेण विश्वविद्यालयप्रशासनेन अद्य विधि-पारङ्गत (LL.M.) प्रथमसत्रपरीक्षायाः अन्तिमप्रश्नपत्रस्य समाप्तेः केवलं चतसृषु (४) होरासु (घण्टासु) एव परीक्षाफलं घोषितम्। अस्मिन् वर्षे जनवरीमासे विश्वविद्यालयेन विधिशास्त्रे नूतनः स्नातकोत्तरपाठ्यक्रमः आरब्धः।
एतस्याः उपलब्धेः विषये परीक्षानियन्त्रकः डॉ. प्रशान्तज्योतिगौतममहोदयः उक्तवान् यत्, परीक्षाफलस्य प्रतीक्षायां परीक्षार्थिनां यः बहुमूल्यः समयः प्रायशः नष्टः भवति, तस्य रक्षणार्थमेव एषा विशिष्टा व्यवस्था कृता। सः अवदत् यत् आधुनिक-अङ्कीय-प्रविधेः (Digital Technology) मानवीयप्रयत्नस्य च सुदृढसमन्वयेन एतादृशे न्यूनतमे समये परीक्षाफलं प्रकाशयितुं शक्यम् अभवत्। अपि च सूचितं यत् परीक्षार्थिनः विश्वविद्यालयस्य जालपुटे (Website) निश्चित-सङ्केत-माध्यमेन (Link) स्वकीयाम् अङ्कतालिकां (Score Card) प्राप्तुं (Download) शक्नुवन्ति। तदतिरिक्तं, छात्राणां सौकर्यार्थं विश्वविद्यालयेन उत्तरपुस्तिकानां पुनर्मूल्याङ्कनाय (Re-evaluation) अपि अन्तर्जालमाध्यमेन आवेदनस्य व्यवस्था कृता अस्ति। पुनर्मूल्याङ्कनार्थं अन्तर्जाल-आवेदनस्य अन्तिमा तिथिः ४ अगस्त, २०२६ इति निर्दिष्टा अस्ति।
उल्लेखनीयम् अस्ति यत् कुलपतेः आचार्य-प्रह्लाद-रा-जोशी-महोदयस्य दूरदर्शिनि नेतृत्वे राष्ट्रिय-शिक्षा-नीतिः २०२० (NEP 2020) इत्यस्याः प्रभावी-कार्यान्वयनाय विश्वविद्यालयः निष्ठापूर्वकं प्रगत्या प्रसरति। विश्वविद्यालयस्य सूत्रानुसारं शैक्षणिकव्यवस्थायां पारदर्शिता, क्षिप्रता, आधुनिकता च समाविष्टा, येन कारणेन पारम्परिक-समयात् बहुपूर्वमेव परीक्षाफलं घोषितुं समर्थाः अभवन्। विश्वविद्यालयस्य एतादृशः प्रशंसनीयः उपक्रमः छात्रसमुदायस्य कृते विशेषतः लाभदायकः भविष्यति इति आशास्यते।
