कविकुलगुरुकालिदाससंस्कृतविश्वविद्यालये १५ जुलाई दिनाङ्के ‘महाकवि कालिदास संस्कृतव्रती राष्ट्रीय पुरस्कार’ समारोहः
संस्कृतभाषायाः भारतीयज्ञानपरम्परायाश्च राष्ट्रिय-अन्ताराष्ट्रिय-विदुषां भविष्यति सम्मानम्
हिमसंस्कृतवार्ता: — डॉ रेणुका बोकारे नागपुरम्।
कविकुलगुरुकालिदाससंस्कृतविश्वविद्यालयद्वारा प्रतिवर्षं पं. रामनारायण शर्मा वैद्यमहोदयस्य स्मृतौ पं. रामनारायण शर्मा आयुर्वेद-अनुसन्धानप्रतिष्ठानस्य, स्थानीयमण्डलाप्रशासनस्य तथा च महाराष्ट्रपर्यटनविकासमण्डलस्य (नागपुरम्) संयुक्ततत्त्वावधाने ‘महाकवि कालिदास संस्कृतव्रती राष्ट्रीय पुरस्काराः’ प्रदीयन्ते। समाजे संस्कृतभाषां गौरवपूर्णं स्थानं प्रापयितुम् अमूल्यं योगदानं प्रदातृभ्यः महान्-विभूतिभ्यः विश्वविद्यालयपक्षतः एषः प्रतिष्ठितः पुरस्कारः प्रदीयते।
वर्ष २०२३, २०२४ तथा २०२५ तमवर्षाणां कृते ‘महाकवि कालिदास संस्कृतव्रती राष्ट्रीय पुरस्काराः’ आषाढमासस्य प्रथमदिवसस्य शुभे अवसरे बुधवासरे, १५ जुलाई २०२६ दिनाङ्के प्रातः ११:०० वादने रामटेकक्षेत्रे एकेन विशेषसमारोहेण महाकविकालिदासदिवसस्य उपलक्षणे विशिष्टातिथीनां करकमलैः प्रदास्यन्ते। एते पुरस्काराः तिसृषु श्रेणीषु—अन्तर्राष्ट्रियसंस्कृतविद्वान्, वरिष्ठसंस्कृतविद्वान् तथा च युवासंस्कृतविद्वान्—इति श्रेणीषु प्रदीयन्ते।
समारोहस्य अध्यक्षतां विश्वविद्यालयस्य माननीयाः कुलपतयः डॉ. अतुलवैद्यमहोदयाः विधास्यन्ति। विश्वविद्यालयस्य संस्थापकाः कुलपतयः डॉ. पंकजचान्देमहोदयाः मुख्यातिथिरूपेण तथा च प्रो. गणपतीयादवमहोदयाः (पूर्वकुलपतयः, आईसीटी विश्वविद्यालयः, मुम्बई) विशिष्ट-अतिथिरूपेण उपस्थिताः भविष्यन्ति। बैद्यनाथसंस्थायाः निदेशकाः डॉ. सुरेशशर्मामहोदयाः तथा च महाराष्ट्रपर्यटनविकासमण्डलस्य वरिष्ठाः प्रादेशिकप्रबन्धकाः श्रीदिनेशपाटीलवर्यः विशेषातिथयः भविष्यन्ति। संस्कृत-संस्कृतेतरभाषासङ्कायस्य अधिष्ठात्री प्रो. कविताहोलेमहोदया कुलसचिवः डॉ. रोशन-अलोनेमहोदयश्च अपि मञ्चासीनाः स्थास्यन्ति।
महाकवि कालिदास संस्कृतव्रती राष्ट्रीय पुरस्कारः – २०२३, २०२४ एवं २०२५ विविधश्रेणीषु पुरस्कृताः विद्वांसः अधोनिर्दिष्टसारण्यां प्राप्यन्ते—
पुरस्कारश्रेणीपुरस्कृतविद्वांसः विदुष्यश्च
अन्तर्राष्ट्रियसंस्कृतविद्वच्छ्रेणी
१. प्रो. चाँदकिरण सलूजा – संस्कृत-शिक्षाशास्त्रयोः अन्ताराष्ट्रियख्यातिप्राप्तविद्वान्, सदस्यन्यासी एवं शिक्षाविद् निदेशकः, संस्कृतसंवर्धनप्रतिष्ठानम्, नवदेहली।
२. प्रो. सरोजा भाटे, पुणे – संस्कृतव्याकरणस्य प्राच्यविद्यायाश्च अन्ताराष्ट्रियख्यातिप्राप्ता विदुषी, अध्यक्षा, प्रज्ञापाठशाला, वाई।
३. प्रो. माधव देशपांडे – कैलिफ़ोर्निया (संस्कृतव्याकरण-भाषाशास्त्र-संस्कृतप्राकृतभाषाणां विशेषज्ञः, मिशिगनविश्वविद्यालयस्य पूर्वप्राध्यापकः, अमेरिका।
ज्येष्ठ (वरिष्ठ) संस्कृतविद्वच्छ्रेणी
१. श्रीनन्दकिशोर पत्तरकिने – संस्कृतपत्रकारिता-भारतीयज्ञानपरम्परा-प्राच्यविद्याक्षेत्रेषु उल्लेखनीययोगदानाय प्रख्यातविद्वान्, पूर्वसम्पादकः, ‘संस्कृत भवितव्यम्’, नागपुरम्
२. प्रो. कालुरी हनुमंत राव – संस्कृतस्य सुप्रसिद्धविद्वान्, सिकन्दराबादः
३. प्रो. कृष्णकांत शर्मा – भारतीयदर्शनशास्त्रस्य विशेषज्ञः, पूर्वप्राध्यापकः, बनारस हिन्दू विश्वविद्यालयः, वाराणसी
युवासंस्कृतविद्वच्छ्रेणी
१. डॉ. रामकृष्ण पेजथाय – संस्कृतसाहित्य-ज्योतिष-भारतीयज्ञानपरम्पराणां तथा अष्टावधानकलायाः संरक्षणे उल्लेखनीययोगदानाय, चाणक्यविश्वविद्यालयः, बेङ्गलूरु
२. प्रो. वीरनारायण पांडुरंगी – वेदभाष्यकारः, भारतीयदर्शनशास्त्रस्य विद्वान्, पूर्णप्रज्ञपाठशालायाः निदेशकः, बेङ्गलूरु
३. डॉ. सचिन कठाळे – संस्कृतप्रचार-प्रसारस्य अग्रणी, ‘संभाषणसंदेशः’ पत्रिकायाः सम्पादकः, नागपुरम्
पुरस्कारराशिः सम्मानञ्च
अस्य पुरस्कारस्य अन्तर्गतम् अन्ताराष्ट्रियसंस्कृतविद्वच्छ्रेण्याः तथा वरिष्ठसंस्कृतविद्वच्छ्रेण्याः प्रत्येकस्मै पुरस्कारविजेत्रे ₹५०,००० (पञ्चाशत्सहस्ररूप्यकाणि) तथा च युवासंस्कृतविद्वच्छ्रेण्याः प्रत्येकस्मै पुरस्कारविजेत्रे ₹२५,००० (पञ्चविंशतिसहस्ररूप्यकाणि) पुरस्कारराशिः, सम्मानपत्रं, शालवस्त्रं, श्रीफलं च प्रदास्यते।
