विकसितभारतस्य सङ्कल्पः अधिकं सुदृढः भविष्यति – अनुरागठाकुरः
हिमसंस्कृतवार्ता: — शिमला।
पूर्वकेन्द्रीयमन्त्री सासंदश्च अनुरागसिंहठाकुरः सोमवासरे शिमलाप्रवासकाले विश्वप्रसिद्ध-जाखूमन्दिरे भगवान् हनुमद्दर्शनं कृत्वा आशीर्वादं प्राप्तवान्। एतस्मात् परं तेन ‘एकं वृक्षं मातुः नाम्नि’ (एक पेड़ मां के नाम) अभियानस्य अन्तर्गतं आयोजिते वृक्षारोपणकार्यक्रमे भागं गृहीत्वा पर्यावरणसंरक्षणस्य सङ्केतः दत्तः। अनुरागठाकुरः अवदत् यत् शिमलाम् आगच्छन् प्रत्येकः श्रद्धालुः यदि जाखूमन्दिरे हनुमानजी इत्यस्य दर्शनं न करोति, तर्हि तस्य यात्रा अपूर्णा मन्यते। एतत् स्थलं न केवलं श्रद्धायाः केन्द्रम् अस्ति, अपितु राष्ट्रसेवायाः सकारात्मक-ऊर्जायाः च प्रतीकं वर्तते। तेन कथितं यत् भगवतः हनुमत: चरणयोः तेन प्रधानमन्त्रिणः नरेन्द्रमोदिनः उत्तमस्वास्थ्याय, दीर्घायुषे तथा च विकसितभारतस्य सङ्कल्पस्य सफलतायै प्रार्थना कृता।
प्रधानमन्त्रिणः नरेन्द्रमोदिनः नेतृत्त्वे केन्द्रीयसर्वकारस्य १२ वर्षाणि सेवा-सुशासन-गरीबकल्याण-राष्ट्रनिर्माणानां स्वर्णिम-अध्यायाः अभवन्। वर्ष २०१४ मध्ये भारतं यत्र विश्वस्य १० तमा (दशमी) बृहती अर्थव्यवस्था आसीत्, तत्रैव अद्य भारतं विश्वस्य पञ्चमा बृहती अर्थव्यवस्था संजाता अस्ति, संसारे च तीव्रगत्या वर्धमानासु प्रमुखासु अर्थव्यवस्थासु सम्मिलिता अस्ति। तेन प्रतिपादितं यत् गते एकदशके २५ कोटिभ्यः (२५,००,००,०००) अधिकाः नागरिकाः दारिद्र्यरेखायाः बहिः आगताः, कोटिशः परिवारेभ्यः सुदृढगृहं (पक्का घर), वायुकोशसंयोजनं (गैस कनेक्शन), शौचालयम्, वित्तकोषसंख्या:, नलेन जलं, निश्शुल्कं स्वास्थ्यसुरक्षा च उपलब्धा: कृताः सन्ति। हिमाचलप्रदेशस्य सन्दर्भे अनुरागठाकुरः अवदत् यत् प्रधानमन्त्रिणः मोदिनः नेतृत्त्वे प्रदेशाय विकासस्य अभूतपूर्वाः उपहाराः प्राप्ताः।
एम्स (AIIMS) बिलासपुरं, नूतनाः आयुर्विज्ञानमहाविद्यालयाः (मेडिकल कॉलेज), राष्ट्रियमार्गाणां व्यापकः विस्तारः, धूमशकटमार्ग-सम्पर्कसुदृढीकरणाय योजनाः, जलजीवनमिशनम्, प्रधानमन्त्रावासयोजना, उज्ज्वलायोजना, प्रधानमन्त्री-ग्रामसड़क-योजना अन्याश्च जनकल्याणकारिण्यः योजनाः याभिः लक्षशः परिवाराः लाभान्विताः अभवन्। तेन उक्तं यत् प्रधानमन्त्री-ग्रामसड़क-योजनान्तर्गतं वर्ष २०२५-२६ मध्ये एव हिमाचलाय २,२४७ कोटिरूप्यकाणां व्ययेन २९४ ग्रामीणमार्गपरियोजनाभ्यः स्वीकृतिः दत्ता अस्ति, यासु प्रायः २,०१९ कोटिरूप्यकाणां केन्द्रीयभागः (अंश) अस्ति। समाननागरिकसंहिता (UCC) इति विषये पृष्टस्य प्रश्नस्य उत्तरं ददत् अनुरागठाकुरः अवदत् यत् समाननागरिकसंहिता भारतीयजनतापक्षस्य स्पष्टः सङ्कल्पः वर्तते। देवभूमि-उत्तराखण्डतः अस्य आरम्भः जातः अस्ति, आगामिसमये अन्येषु राज्येष्वपि चरणबद्धरूपेण एषा प्रवर्तिष्यते। पाकिस्तानसम्बन्धि-प्रश्ने तेन कथितं यत् पाकिस्तानं प्रायः प्रत्येकस्मिन् क्षेत्रे विफलराष्ट्रं सिद्धं संजातम्। यदि तत् कस्मिंश्चित् क्षेत्रे सफलं वर्तते, तर्हि तत् केवलम् आतङ्कवादस्य प्रोत्साहने एव अस्ति। स्वकीयानाम् आन्तरिकविफलतानाम् अव्यवस्थानां च दोषं भारतस्य उपरि पातनं तस्य पुरातन; अभ्यासः अस्ति। तेन प्रख्यापितं यत् भारतं निरन्तरं अग्रे वर्धते, यत्रैव पाकिस्तानं स्वकीयदोषपूर्णनीतीनां कारणेन संसारे एकाकी (पृथक्) भवति।
राजभवनं गत्वा राज्यपालेन सह अमिलत् अनुरागठाकुरः
हमीरपुर-लोकसभाक्षेत्रस्य सासंदः अनुरागसिंहठाकुरः हिमाचलप्रदेशस्य राज्यपालेन कवीन्द्रगुप्तेन सह शिमलास्थे लोकभवने शिष्टाचारमेलनं कृतवान्। तेन पारम्परिक-हिमाचलीरीत्या राज्यपालस्य अभिनन्दनं विहितं, हिमाचलस्य हितेन सम्बद्धानां विभिन्नानां विषयाणाम् उपरि च विमर्शः कृतः।
