राष्ट्रपतिः मुर्मु महोदया अयोध्यायाः मन्दिरे ‘श्रीरामयन्त्र’ स्थापनासमारोहे भागं गृहीतवती

राष्ट्रपतिः मुर्मु महोदया अयोध्यायाः श्रीरामजन्मभूमिमन्दिरे पूजा-अर्चनं कृतवती तथा च मन्दिरे ‘श्रीरामयन्त्र’ स्थापनासमारोहे भागं गृहीतवती
हिमसंस्कृतवार्ता। राष्ट्रपतिः द्रौपदी मुर्मु उक्तवती यत् देशः सामाजिक-आर्थिक-राजनीतिक-सांस्कृतिकक्षेत्रेषु पुनर्जागरणस्य काले अस्ति, अयोध्यायाः श्रीरामजन्मभूमिमन्दिरं च अस्य प्रतीकम् अस्ति। राष्ट्रपतिमहोदया अयोध्यायां एकां सभां सम्बोधयन्ती आसीत्। सा वर्तमानकाले उत्तरप्रदेशस्य त्रिदिवसीयभ्रमणे अस्ति। श्रीमती मुर्मु श्रीरामजन्मभूमिमन्दिरं गत्वा आरतीं अकरोत् तथा च ‘श्रीरामयन्त्र’ स्थापनासमारोहे भागं गृहीतवती। वैदिकमन्त्राणां घोषेण सह अद्य मन्दिरस्य द्वितीयतले श्रीरामयन्त्रं स्थापितम्। अस्मिन् अवसरे मुख्यमन्त्री योगी आदित्यनाथः अवदत् यत् अद्यतनः भारतः न केवलं ‘नव्यभारतं’ अपितु ‘परिवर्तितं भारतम्’ अपि अस्ति। सः सूचितवान् यत् विगतवर्षे प्रायः 158 कोटिः श्रद्धालवः राज्यस्य विभिन्नमन्दिराणां दर्शनं कृतवन्तः।

राष्ट्रपतिः द्रौपदी मुर्मु वृन्दावने स्थितं प्रेममन्दिरं इस्कॉन-मन्दिरं च गत्वा पूजा-अर्चनं कृतवती
ततः परं राष्ट्रपतिः वृन्दावने प्रेममन्दिरं इस्कॉन-मन्दिरं च गत्वा पूजां कृतवती। अत्र राज्यपाल आनन्दीबेन पटेल अपि उपस्थितवती। राष्ट्रपतिमहोदया विश्वासं प्रकटितवती यत् श्रीरामस्य आशीर्वादेन भारतं 2047 पर्यन्तं ‘विकसितराष्ट्रस्य’ लक्ष्यं प्राप्स्यति।आगामिनि दिने सा रामकृष्णमिशनसेवाश्रमे अर्बुद-रोग (Oncology) खण्डस्य उद्घाटनं करिष्यति तथा च उडि़या बाबा आश्रमं, दावानलकुण्डं, नीब करोरी बाबा समाधिं च गमिष्यति।