पोलैंडदेशेन आतंकवादं प्रति शून्य-सहिष्णुता प्रदर्शनीया-विदेशमन्त्री एस.जयशंकर:

पोलैंडदेशेन आतंकवादं प्रति शून्य-सहिष्णुता प्रदर्शनीया, सहैव भारतस्य प्रतिवेशी- आतंकवादसंरचनायै अपि तेन साहाय्यं न दातव्यम् – विदेशमन्त्री एस.जयशंकर: ।
हिमसंस्कृतवार्ता: – विदेशमंत्री डॉ. एस. जयशंकरः नवदेहल्यां पोलैंड देशस्य उप-प्रधानमन्त्रिणा विदेश-मन्त्रिणा च श्री रादोस्वाफ शिकोर्की वर्येण साकं शिष्टाचार-मेलनोपवेशनं व्यदधात्। उपवेशनस्य अवसरे भारत-पोलैंड-देशयोः द्विपक्षीय-सम्बन्धानां, परस्परं सहयोगस्य, समकालिका-न्ताराष्ट्रिय-प्रकरणानां च विषये विचार-विमर्शः विहितः। अस्मिन् अवसरे उभाभ्यामपि नेतृभ्यां राजनीतिक-आर्थिक-वैश्विक मञ्चेषु सहयोगस्य सुदृढीकरणे सविशेषं बलं प्रदत्तम्। उपवेशनमिदं भारत-पोलैंड-देशयोः मैत्रीपूर्णाः सम्बन्धाः नवीनोच्चतां प्रति प्रापकः महत्वपूर्णः पदक्षेपः आमान्यते। विदेशमन्त्री डॉ. एस्. जयशंकरः उक्तवान् यत् पोलैंडदेशेन आतंकवादं प्रति शून्य-सहिष्णुता प्रदर्शयितव्या, सहैव भारतस्य सीमायाः पार्श्वे आतंकवादसंरचनायै अपि तेन साहाय्यं न दातव्यम्। तेन अग्रे प्रोक्तं यत् पोलैंडदेशः भारतीयं क्षेत्रं परिचिनोति अथ च भारतस्य पारेसीम आतंकवादस्य दीर्घकालिक-संकट-विषये सम्यक्तया अवगतः अस्ति। तत्र सम्पन्ने समुपवेशने पक्ष-द्वयेनापि क्षेत्रीयं वैश्विकं च घटनाक्रम-विषये विचार-मन्थनानि कृतानि। ध्येमस्ति यदत्रावसरे डॉ. जयशंकरः प्रोदैरयत् यत् सद्य पूर्वमेव तेन न्यूयॉर्क पेरिस् स्थलेषु यूक्रेन-संकटस्य विषये भारतस्य दृष्टिकोणः अपि प्रकाशितः आसीत्। तेन स्पष्टीकृतं यत् भारतं विरुध्य चयनात्मक-लक्ष्यनिर्धारणं अन्याययुक्तं अनुचितं चास्ति। अमुना एतदपि प्रोक्तं यत् पोलैंड-देशः केंद्रीय-यूरोप-महाद्वीपे भारतस्य प्रमुखः व्यापार-सहयोगी अस्ति। द्वयोः राष्ट्रयोः मध्ये द्विपक्षीय व्यापारः सप्त-अरब डॉलर मूल्यतोपि अधिकः जातः अस्ति, यत्र विगते दशके एव प्रायः प्रतिशतं द्वि-शत-मितं वर्धनं दरीदृश्यते। भारतेन पोलैंडदेशे त्रि-अरब-डॉलर-मूल्यादपि अधिकः निवेशः कृतः वर्तते, येन तत्र नैकाः जीवाकावसराः सृष्टाः सन्ति। भारतस्य दृढा आर्थिकी वृद्धिः, महती आपण-क्षमता, निवेश-हितकर-नीतयः च पोलैंड-देशस्य व्यवसायि-जनेभ्यः भूरि अवसरान् प्रयच्छन्ति।