कांगड़ाया: सर्वाणि शक्तिपीठानि वंदेभारतरेलयानेन सम्बद्धानि भवेयु: – डॉ राजीव: भारद्वाज:
हिमसंस्कृतवार्ता: – धर्मशाला।
काङ्गड़ासंसदीयक्षेत्रस्य सांसद: डॉ. राजीव: भारद्वाजः संसदि रेलसंशोधनविधेयकं २०२४ विषये वदन् काङ्गड़ामण्डलस्य सर्वाणि शक्तिपीठानि वंदेभारतरेलयानेन सह सम्बद्धानि भवेयुः इति आग्रहं कृतवान्। विधेयकस्य समर्थने वदन् सः अवदत् यत् सम्प्रति वन्देभारत-रेलयानं दिल्लीतः अम्ब- अन्दौरापर्यन्तं गच्छति, केवलम् एकं पर्वतं खनित्वा काङ्गड़ामण्डलस्य अन्यानि धार्मिकस्थानानि बृजवेश्वरीदेवी, ज्वालाजी, चामुण्डादेवी एतानि शक्तिपीठानि च वन्देभारतरेलयानेन सह सम्बद्धानि भविष्यन्ति। एतेन देशस्य विदेशेभ्यः च भक्तानां पर्यटकानां च सुविधा भविष्यति। लोकसभायां वदन् सः अवदत् यत् धर्मशाला अन्ताराष्ट्रीय- पर्यटनस्थलं यत्र तिब्बतीधर्मनेता दलाईलामा निवसति, एतदतिरिक्तं डलसरोवर: इत्यादीनि पर्यटनस्थानानि सन्ति यत्र विश्वस्य सर्वेभ्यः जनाः भ्रमणार्थम् आगच्छन्ति। धर्मशालापर्यन्तं वंदेभारतरेलयानस्य चालनेन क्षेत्रं समृद्धं भविष्यति, रोजगारस्य अवसराः च वर्धन्ते इति उक्तवान्। सः अवदत् यत् काङ्गड़ामण्डलं सम्बद्धीकरोति एकमात्ररेलमार्गः अधिकतया बाधित: भवति। अतः एतद् पठानकोट- जोगिन्दरनगर-रेलमार्गं व्यापकमापकं कर्तुमपि आग्रहं कृतवान्। अस्य रेलमार्गस्य व्यापकमापनार्थम् अन्तिमभौतिकसर्वेक्षणस्य केन्द्रसर्वकारस्य निर्णयस्य स्वागतं कृतवान्। सः अवदत् यत् डलहौजी, चम्बा, खज्जियार इत्यादीनि अन्ताराष्ट्रीयपर्यटनस्थानानि काङ्गड़ा लोकसभाक्षेत्रस्य अन्तर्गतानि आगच्छन्ति, चम्बा- करवस्त्रस्य, चौगानस्य, स्थालिका: च विश्वप्रसिद्धाः सन्ति किन्तु इदं क्षेत्रम् अद्यापि रेलजालेन सह न सम्बद्धः इति अवदत्। सः आगामिनि रेलबजटे चम्बानगरं पठानकोटनगरेण रेलमार्गेण सम्बद्धं कर्तुं अनुरोधं कृतवान्। सः अस्मिन् अधिनियमे रेलवेमण्डलस्य भूमिकां वर्धयितुं स्वागतं कृतवान्, अनेन रोजगारस्य अवसराः वर्धयिष्यन्ति इति च अवदत्। कवच-रेलयानस्य चालनार्थं रेलमन्त्रिणः प्रशंसाम् अकरोत्, एतेन यात्रिकाणां सुरक्षायाः प्रति रेलवे-प्रतिबद्धतां दर्शयति इति च अवदत्। विगतदशवर्षेषु रेलविद्युत्करणे प्राप्तानां असाधारणानां उपलब्धीनां कृते रेलमन्त्रिण: अभिनन्दनं धन्यवादं च दत्तवान्।
