Vande Bharat: राज्ये वन्देभारतबससेवा आरब्धा, पालमपुरतः काङ्गड़ामार्गेण अम्बं प्रति गमिष्यति बसयानम्
हिमसंस्कृतवार्ता:- कार्यालयीय: प्रतिनिधि:।
हिमाचलप्रदेशपर्यटनविकासनिगमेन हिमाचलप्रदेश- पर्यटन- वन्देभारत- बससेवा आरब्धा, यस्य शुभारम्भ: शनिवासरे उपमुख्यमन्त्री मुकेश अग्निहोत्री, पर्यटनविकासनिगमस्य अध्यक्षः (मन्त्रिमण्डलपदवी) आर. एस. बाली हरितध्वजं प्रदर्श्य कृतवन्तौ। अस्मिन्नवसरे सः अवदत् यत् राज्यस्य प्रथमा वंदेभारतबससेवा पालमपुरतः ऊनामण्डले अम्बपर्यन्तं नागरोटा- काङ्गड़ामार्गेण आरभ्यते, यस्य उद्देश्यं वंदेभारतरेलयानस्य पर्यटकान् काङ्गड़ामण्डलं प्रति आनेतुं वर्तते। एतद् बसयानं पालमपुरतः प्रातः ८ वादने प्रचलिष्यति, अम्बतः काङ्गड़ा पालमपुरं च प्रातः ११:३० वादने पर्यटकान् नेष्यति।
वन्देभारत-बसयानं वोल्वोश्रेण्याः बससेवा वर्तते, या सर्वाभि: सुविधाभिः परिपूर्णा भविष्यति। अस्मिन् पर्यटकाः काङ्गड़ा-यात्रायाः आनन्दं लब्धुं शक्नुवन्ति ।
हिमाचले पर्यटनस्य उन्नतिः भविष्यति- उपमुख्यमन्त्री
अग्निहोत्री इत्यनेन उक्तं यत् जनानां कृते वन्देभारत बससेवायाः निरन्तरसुविधा भविष्यति। अस्याः बससेवायाः माध्यमेन हिमाचलप्रदेशे पर्यटनस्य अपि प्रचारः भविष्यति। अस्याः बससेवायाः संचालनेन काङ्गड़ामण्डलस्य जनानां कृते बहु सुविधा भविष्यति इति सः अवदत्। इयं बससेवा काङ्गरामण्डलस्य जनानां कृते वंदेभारतरेलयानेन यात्रां कर्तुं बहु लाभप्रदा सिद्धा भविष्यति। सः अवदत् यत् पूर्वं काङ्गड़ामण्डलस्य जनानां वंदेभारत-रेलयानं ग्रहीतुं निजीवाहनं टैक्सी-यानं वा गृहीत्वा अम्बनगरं गन्तव्यम् भवति स्म। परन्तु अधुना अस्य बसयानस्य चालनेन जनाः बहु लाभं प्राप्स्उ। एतेन जनानां धनस्य समयस्य च रक्षणं भविष्यति, पर्यटनक्षेत्रस्य अपि उन्नतिः भविष्यति।
बसमार्गेषु बसमार्गाः योजिताः भवन्ति
सः अवदत् यत् हिमाचलप्रदेशे पर्यटनस्य प्रवर्धनार्थं व्यवस्थितरूपेण बसयानानां जालं स्थापयितुं सर्वप्रयत्नाः क्रियन्ते। सः अवदत् यत् जनानां सुविधायै रेलस्थानकानि, चिकित्सालयाः, विमानस्थानकानि, धार्मिकपर्यटनस्थानानि च बसमार्गेण संयोज्यन्ते। अस्यां श्रृङ्खलायां चिन्तपूर्णीतः खाट्टूश्यामपर्यन्तं, हमीरपुरतः वृन्दावनपर्यन्तं, हमीरपुरतः अयोध्यापर्यन्तं बससेवा अपि प्रचलिता अस्ति।
