प्रदेशाय ३१ मई पर्यन्तं सज्जा भवतु पोषणनीतिः, मुख्यमन्त्रिणः निर्देशाः
हिमसंस्कृतवार्ता: – शिमला।
हिमाचलप्रदेश-सर्वकारेण राज्ये स्वास्थ्यसेवाः सुदृढीकर्तुं जनेभ्यः च उत्तमं पोषणं उपलब्धं कारयितुं महान् पदक्षेपः स्वीकृतः। मुख्यमन्त्रिणा सुखविन्दरसिंहसुक्खुना स्वास्थ्यविभागः ३१ मई पर्यन्तं राज्यस्य पोषणनीतिं निर्मातुं निर्दिष्ट। सोमवासरे सायङ्काले स्वास्थ्यविभागस्य वरिष्ठैः अधिकारिभिः सह आयोजिते उपवेशने मुख्यमन्त्रिणा उक्तं यत् ‘फिट हिमाचलम्’ (स्वस्थ-हिमाचलम्) इति लक्ष्यं प्राप्तुं जनान् पोषणयुक्त-भोजनस्य महत्त्वं प्रति जागरूकं करणं अत्यन्तम् आवश्यकम् अस्ति।
अस्मिन् विषये देशस्य प्रथमं राज्यं भवितुं शक्नोति हिमाचलप्रदेश:
सर्वकारस्य विश्वास: अस्ति यत् हिमाचलप्रदेशः व्यापकां पोषणनीतिं सज्जीकर्तुं देशस्य प्रथमं राज्यं भवितुं गच्छति। मुख्यमन्त्रिणा उक्तं यत् उत्तमस्वास्थ्याय केवलं चिकित्सा एव न, अपितु उचितं खानपानं पोषणं चापि अनिवार्यं वर्तते। एतदेव विचिन्त्य सर्वकारः पोषणनीतिं अन्तिमरूपं दातुं संलग्णः अस्ति।
रुग्णानां सम्पूर्णं विवरणं ‘अङ्कीकृतं भविष्यति
उपवेशनस्य अन्तराले मुख्यमन्त्रिणा स्वास्थ्यसेवासु अङ्कीकरणं (Digitization) तीव्रं कर्तुं निर्देशाः दत्ताः। तेन उक्तं यत् रुग्णानां सम्पूर्णं विवरणं (Data) अन्तर्जालपुटे (Online) उपलब्धं कारयितव्यं, येन जनेभ्यः पञ्जीकरणाय, परीक्षण-प्रतिवेदनेभ्यः (Reports) अन्य-प्रपत्रेभ्य: च चिकित्सालयेषु कष्टं सोढव्यं न भवेत्। अनेन स्वास्थ्यसेवाः पूर्वमपेक्षया सरलाः प्रभाविन्यः च भविष्यन्ति।
आईजीएमसी-चिकित्सालयात् आरप्स्यते ‘पायलट-परियोजना’
मुख्यमन्त्रिणा इन्दिरागान्धी-आयुर्विज्ञान-महाविद्यालये चिकित्सालये च (IGMC) परीक्षण-प्रकल्पत्वेन (Pilot Project) पैथोलॉजी, रेडियोलॉजी, माइकोलॉजी, बायो-केमिस्ट्री तथा फार्मेसी विभागानां सम्पूर्णं विवरणं अङ्कीकर्तुं निर्देशाः दत्ताः। अस्य कृते पर्याप्त-कर्मचारिणां प्रदाने अपि आश्वासनं दत्तम्। सर्वकारस्य योजना अस्ति यत् पश्चात् एषा व्यवस्था ‘आईजीएमसी’ इत्यस्य सर्वेषु विभागेषु राज्यस्य अन्य-आयुर्विज्ञान-महाविद्यालयेषु च विस्तारयिष्यते।
स्वास्थ्यसुविधासु ३००० कोटि-रूप्यकाणि व्ययिष्यति सर्वकारः
मुख्यमन्त्रिणा उक्तं यत् प्रदेशवासिभ्यः विश्वस्तरीयाः स्वास्थ्यसुविधाः दातुं सर्वकारः कटिबद्धः अस्ति। स्वास्थ्य-व्यवस्थां सुदृढीकर्तुं अत्याधुनिक-यन्त्राणां उपकरणेषु च प्रायः ३००० कोटि-रूप्यकाणां व्यय-योजना निर्मिता अस्ति। एतदतिरिच्य त्रिषु आयुर्विज्ञान-महाविद्यालयेषु स्वचालित-प्रयोगशालानां (Automatic Labs) स्थापनाय ७५ कोटि-रूप्यकाणि स्वीकृतानि। सर्वकारः आयुर्विज्ञान-महाविद्यालयेषु ‘सीनियर रेजिडेंट’ वैद्यानां स्थानानि द्विगुणानि कर्तुं कार्यं करोति। मुख्यमन्त्रिणा उक्तं यत् चिकित्सालयानां उत्तम-सञ्चालने रुग्णानां गुणात्मक-चिकित्सायां च एतेषां वैद्यानां प्रमुखा भूमिका भवति।
