चिट्टा-विक्रयिणः अधिकारिणः कर्मचारिणः च भविष्यन्ति पदच्युताः, सेवनकर्तृणां भविष्यति अन्वेषणं विभागीय-सचिवेभ्य: प्रदत्ता सूची
हिमसंस्कृतवार्ता: – शिमला।
हिमाचलप्रदेश-सर्वकारेण ‘चिट्टा’ तथा अन्य-‘एनडीपीएस’ प्रकरणेषु संलिप्तानां सर्वकारीय-अधिकारिणां कर्मचारिणां च विरुद्धं कठोरा कार्यविधि: प्रारब्धा। अधुना चिट्टा-विक्रयिणः सर्वकारीय-अधिकारिणः कर्मचारिणः च पदच्युताः (बर्खास्त) भविष्यन्ति, सेवनकर्तृणां च विभागीय-अन्वेषण-प्रक्रिया भविष्यति। मुख्यमन्त्रिणा सुखविन्दरसिंहसुक्खुना उक्तं यत् प्रदेश-सर्वकारः मादकद्रव्य-विरुद्धं व्यापकम् अभियानं चालयति, मादकद्रव्य-तस्करेषु संलिप्तानां सर्वकारीय-कर्मचारिणां कृते च ‘शून्य-सहनशीलता’ (Zero Tolerance) नीतिः स्वीकृता। मङ्गळवासरे प्रदेश-सचिवालये आयोजिते उपवेशने चिट्टा-प्रकरणेषु संलिप्तानां कर्मचारिणां सूची विभागीय-सचिवेभ्य: प्रदत्ता।
अधुना चिट्टा-प्रकरणेषु एवं भविष्यति कार्यविधि:
मुख्यमन्त्रिणा उक्तं यत् अधुना कार्यविधि: अस्य आधारेण भविष्यति यत् सम्बन्धितः अधिकारी कर्मचारी वा चिट्टा-व्यापारे संलिप्तः अस्ति उत सेवन-प्रकरणे गृहीतः। तेन स्पष्टीकृतं यत् ये कर्मचारिणः नशा-व्यापारे संलिप्ताः प्राप्स्यन्ते, ते सेवायाः निष्कासिताः भविष्यन्ति, सेवनकर्तृणां विरुद्धं च नियमानुसारं कार्यविधि: भविष्यति। सर्वकारस्य अङ्किकानुसारं प्रदेशे अधुना यावत् १२२ सर्वकारीय-अधिकारिणः कर्मचारिणः च चिट्टा तथा अन्य-एनडीपीएस-प्रकरणेषु संलिप्ताः प्राप्ताः। एतेषु ३१ कर्मचारिणां सेवाः समाप्ताः कृताः सन्ति। मुख्यमन्त्रिणा सर्वान् प्रशासनिक-सचिवान् ईदृशेषु प्रकरणेषु कठोरां विभागीय-कार्यविधिं सुनिश्चितं कर्तुं निर्देशः दत्तः।
सर्वाधिक-प्रकरणानि आरक्षक-विभागे
सूची-अनुसारं सर्वाधिकानि २१ प्रकरणानि हिमाचलप्रदेश-आरक्षक-विभागात् प्राप्तानि, सर्वे २१ कर्मचारिणः च सेवायाः पदच्युताः कृताः। विद्युत्-मण्डलस्य १३ कर्मचारिषु एकः निष्कासितः, शिक्षा-विभागस्य १० कर्मचारिणः अन्वेषण-परिधौ सन्ति। बैङ्किङ्ग-जलशक्ति-विभागयोः ९-९ कर्मचारिणः प्रकरणेषु संलिप्ताः प्राप्ताः। सेना-नौसेनाभ्यां सम्बद्धानां ८ कर्मचारिणां नामानि अपि सूच्यां अङ्कितानि सन्ति। ‘एचआरटीसी’ (HRTC) इत्यस्य ८ कर्मचारिषु २ कर्मचारिणां सेवाः समाप्ताः। वन-विभागस्य लोक-निर्माण-विभागस्य च ६-६ कर्मचारिणः अन्वेषण-परिधौ सन्ति। स्वास्थ्य-विभागस्य ४ तथा ‘बीडीओ’ कार्यालयस्य ३ कर्मचारिणां विरुद्धं कार्यविधि: पञ्जीकृता, येषु बीडीओ-कार्यालयस्य २ कर्मचारिणौ पदच्युतौ कृतौ। एतदतिरिच्य खाद्य-आपूर्ति, पशुपालन-अन्य-विभागानां कर्मचारिषु अपि विभागीय-कार्यविधि: प्रचलति। सर्वकारेण स्पष्टीकृतं यत् नशा-तन्त्रात् (Drug network) सम्बद्धः कोऽपि कर्मचारी न त्यक्ष्यते।
