नूतनाब्दे ममेयं शुभा कामना
बालका बालिका योषितश्च नरा,
देशसेवायुता: कर्मशुद्धिर्भरा:।
पादयोर्मातृपित्रोर्गुरोस्स्युर्नता:,
नूतनाब्दे ममेयं शुभा कामना।।१।।
विद्यावृद्धिर्भवेत् सत्पथे चेतना,
सद्गुणैर्भूषिता स्याज्जनस्य क्रिया।
सज्जनैस्सङ्गतिर्दुर्गणाद्दूरता,
नूतनाब्दे ममेयं शुभा कामना।।२।।
भारतीसंस्कृतेर्माननं वर्धतां,
लोकभाषा च न: संस्कृतं जायताम्।
सख्यभावेन लोका वसन्तु क्षितौ,
नूतनाब्दे ममेयं शुभा कामना।।३।।
भ्रातृभाव: समाजे दृढो जायतां,
जातिभेदो मिथो नो कदा वर्धताम्।
मानवा मानवत्वे रमेरन् सदा,
नूतनाब्दे ममेयं शुभा कामना।।४।।
वित्तलोभो नृणां नो कदा वर्ततां,
दानशीलं मन: सर्वदा वर्धताम्।
नीतिभावानमूल्याञ्चिरं धार्यतां,
नूतनाब्दे ममेयं शुभा कामना।।५।।
वृक्षरक्षा तथा नीररक्षा भवेत्,
सर्वतस्सस्ययुक्ता भवेत्काश्यपी।
धर्मयुक्तं जनानां भवेज्जीवनं,
नूतनाब्दे ममेयं शुभा कामना।।६।।
सख्यभावो जगन्मध्ये नित्यं भवेत्,
युद्धभीतिस्सुदूरं भवेत् सर्वत:।
शान्तिसन्देशदूता भवन्तु जना
नूतनाब्दे ममेयं शुभा कामना।।७।।
मातृभाषासु संजायतां सौहृदं ,
सेतुरूपेण नित्यं भवेत्संस्कृतम्।
भाषिकैक्येन राष्ट्रं दृढं जायतां,
नूतनाब्दे ममेयं शुभा कामना।।८।।
ईशभक्तेर्धरा: भावशुद्धौ वरा:,
दुष्टवृत्तेर्हरा: राष्ट्रसेवापरा:।
कर्मयोगे रता: स्युस्समे मानवा:,
नूतनाब्दे ममेयं शुभा कामना।।९।।
जायतां सर्वतो नारीणां माननं,
स्याद्ध्रुवम् बालरक्षाविधानं दृढम्।
दुष्टवृत्तिस्समाजाद् विनश्येत् सदा,
नूतनाब्दे ममेयं शुभा कामना।।१०।।
भूतधात्र्यैव चास्मत्कुटुम्बं हीति,
विश्वसौहार्दभाव: सदा वर्धताम्।
भेदज: संविधि र्नो जनानां भवेत्,
नूतनाब्दे ममेयं शुभा कामना।।११।।
महेशनारायणशास्त्री
कुरेडा, टोङ्क, राजस्थानम्
दूरभाष: ९८२८८७४६०१
