एनएचएआई अधिकारिणा सह प्रहारस्य विषये गडकरी रुष्ट:,

एनएचएआई अधिकारिणा सह प्रहारस्य विषये गडकरी रुष्ट:, मुख्यमन्त्रिणा साकं वार्तां कृत्वा त्वरितकार्यविधि: याचिता
हिमसंस्कृतवार्ता:- शिमला।शिमलानगरे एनएचएआई-अधिकारिणः उपरि प्रहारं कृत्वा केन्द्रीयमन्त्री नितिनगडकरी इत्यनेन रोष: प्रकटित:। गडकरी हिमाचलस्य मुख्यमन्त्री सुखविन्दरसिंह सुखु इत्यनेन सह अस्य विषये भाषितवान्, तत्क्षणं न्यायपूर्णं कार्यविधिं कर्तुं च आग्रहं कृतवान्। गडकरी उक्तवान् यत् अस्मिन् प्रकरणे उत्तरदायित्वं सुनिश्चितं कर्तव्यं, न्यायः च विलम्बं विना प्रदातव्यः। केन्द्रीयमन्त्री ‘X’ इत्यत्र उल्लेखद्वारा एतां सूचनां दत्तवान्।
गडकरी इत्यनेन स्वीये एक्सपटले लिखितं यत्, ‘हिमाचलप्रदेशस्य पंचायतीराजमन्त्री तस्य सहकारिभिः च एनएचएआई पीआईयू शिमलाप्रबन्धकस्य अचलजिन्दलस्य उपरि कृतः जघन्यः प्रहार: अत्यन्तनिन्दनीय: विधिशासनस्य अपमानं च अस्ति।’ स्वस्य आधिकारिकं कर्तव्यं निर्वहन्त: लोकसेवकस्य उपरि एतादृशः क्रूरः आघात: न केवलं व्यक्तिगतसुरक्षां संकटं जनयति अपितु संस्थागत अखण्डताम् अपि नष्टं करोति। मया प्रकरणस्य गम्भीरं संज्ञानं कृत्वा मुख्यमन्त्रिणा सह उक्तं, सर्वेषाम् अपराधिनां विरुद्धं तत्कालं अनुकरणीयं च कार्यविधिं कर्तुम् आग्रहः कृतः। उत्तरदायित्वं सुनिश्चितं कर्तव्यं, न्यायः च विलम्बं विना प्रदातव्यः।’ अवधेयं वर्तते यत् एनएचएआई- अभियन्ता अचल जिन्दलः शिमलानगरस्य भट्टाकूफरं यत्र पञ्चतलीयभवनं पतितं तत्र गृहेषु स्थितिं ज्ञापयितुं प्राप्तवान् आसीत्। तत: पूर्वं पंचायतीराजमन्त्री अनिरुद्धसिंहः शिमलाग्रामीण एसडीएम, पुलिसकर्मिण: चापि स्थलं प्राप्तवन्तः आसन्। अस्मिन् काले एनएचएआई-अभियन्तार: अपि तत्स्थानं प्राप्तवन्तः आसन्। एतस्मिन् समये केचन जनाः एनएचएआई-अभियन्तृ-जनानाम् उपरि चपेटिकया मारयित्वा मुष्टिप्रहारं कृतवन्तः। एतस्मिन् समये जनानां समूहे एकः व्यक्तिः एकस्य अभियन्तु: शिरसि घटेन प्रहारं कृतवान्, येन अभियन्तु: दुर्गतिः अभवत्। अधुना आहत- अभियन्तु: उपालम्भे पुलिसस्थानके ढली इत्यत्र पंचायतीराजमन्त्रिण: विरुद्धं प्रकरणं पञ्जीकृतम्। अचल जिन्दल: स्वस्य उपालम्भे अवदत् यत्, “मन्त्री अस्मान् समीपस्थं कक्षं नीत्वा जलघटेन मां ताडितवान्, येन मम शिरः क्षतिग्रस्तः अभवत्। योगेशः हस्तक्षेपं कृतवान् तदा सः अपि ताडितः अभवत्। एसडीएम- पुलिसकर्मचारिणाम् उपस्थितौ अपि कोऽपि मम साहाय्यं न कृतवान्। शिमला पुलिसाधीक्षकः संजीव गान्धी इत्यनेन प्राथमिकी पंजीकृता इति पुष्टिः कृता।