Kalka-Shimla-Rail : कालका-शिमला रेलवे-मार्गे धाविता आरक्षित- अवकाश- विशेष- लौहपथगामिनी
हिमसंस्कृतवार्ता:- डॉ. पद्मनाभ:, शिमला।
विश्वधरोहरे कालका-शिमला-रेलमार्गे शुक्रवासरे आरक्षित- हॉलीडे- विशेष- लौहपथगामिन्या: संचालनं प्रारब्धम्। रेलवे-मण्डलस्य प्रदत्त- कार्यक्रमानुसारं ५२४४३ क्रमांकस्य रेलयानं कालकातः प्रातः ८:०५ वादने प्रस्थितम्। एतद् रेलयानं सोलने १०:४५ वादने प्राप्तम्, यत्र २ निमेषानां विलम्बेन स्थगित्वा शिमलायाः दिशि प्रस्थितम्। रेलयानस्य यात्रा शिमलायां १:४० वादने सम्पूर्णा जाता, यत्र ८१ यात्रिकाः गतवन्तः। गमनकाले धर्मपुरं, बड़ोग, सोलनं, कंडाघाट, समरहिल इत्यस्मिन् स्थानकेषु स्थगनं भविष्यति। कैथलीघाटे क्रॉसिंग-कारणेन एकं स्थगनं अपि भविष्यति। ५२४४४ क्रमांकस्य रेलयानम् शिमलातः सायं ४:५० वादने कालकायाः दिशि प्रस्थास्यति। आगमनकाले समरहिलं, कंडाघाटं, सोलन, बड़ोग:, धर्मपुरम् इत्येतेषु स्थानेषु स्थगनं भविष्यति। यानं रात्रौ ९:४५ वादने कालकायां आगमिष्यति।
रेलवेमण्डलस्य सोलनस्थानकस्य अधीक्षकः दिनेश शर्मा उक्तवान् यत् क्रिसमस-नववर्षयो: उत्सवमभिलक्ष्य एतद् हॉलीडे-विशेष-रेलयानं प्रारब्धम्। एतद् रेलयानम् एकस्मिन् दिने गमनं च आगमनं च करिष्यति। पर्यटकानां संख्या-वृद्धिं परिगण्य रेलयानस्य संचालनं क्रियते। २८ फरवरी पर्यन्तं एतद् रेलयानं सततं गमिष्यति।
एतद् भाटकं भविष्यति-
रेलयानस्य द्वयोः सामान्यकक्षयोः भाटकं ७५ रूप्यकाणि निश्चितम्। पर्यटककक्षस्य भाटकं ९४५ रूप्यकाणि, प्रथमश्रेणी-कक्षस्य भाटकं ७९० रूप्यकाणि च निर्धारितमस्ति।
पर्यटकानां प्रथमा रुचि:- टॉय-रेलयानम्
वर्षस्य अवशिष्ट-अवकाशानाम्, क्रिसमसस्य, नववर्षस्य च उत्सवाय पर्यटका: कालकातः शिमलायाः गमनागमनं कर्तुम् आरब्धवन्तः। पर्यटकनां संख्यावृद्धिं दृष्ट्वा विशेष- लौह- पथगामिन्या: संचालनं क्रियते। ज्ञातव्यम् यत् प्रतिवर्षं सहस्त्रशः पर्यटका: क्रिसमस-नववर्षयोः शिमलायां आगच्छन्ति। ततः परिवहनमार्गस्य अपेक्षया टॉय-रेलयानं पर्यटकानाम् प्रथमा रुचि: भवति, यतोहि वक्रपर्वतानां मध्ये यदा रेलयानं गच्छति तदा दृश्यम् अत्युत्तमं भवति।
