International Sanskrit Olympiad: अन्ताराष्ट्रीयसंस्कृत-ओलम्पियाड-स्पर्धायां बिजनढलवान-विद्यालयस्य संस्कृतशिक्षकः मनोजकुमारशैलः राष्ट्रियस्तरस्य तृतीयं पुरस्कारं प्राप्तवान्
बिजनढलवानस्य सप्तमश्रेण्याः छात्रा मुस्कान राज्यस्तरस्य प्रथमपुरस्कारं प्राप्नोत्
हिमसंस्कृतवार्ता:- लघ्वीकाशी मण्डी। अन्ताराष्ट्रीयसंस्कृत- ओलम्पियाड- ऑनलाइनपरीक्षा केन्द्रीय- संस्कृत- विश्वविद्यालयेन, नवीदिल्लीद्वारा २४-२५ सितम्बरदिनाङ्के विद्यालयमहाविद्यालयछात्राणां सामाजिकसमूहानां च कृते विभिन्नस्तरेषु आयोजिता। यस्मिन् देशस्य सर्वेभ्यः सहस्रश: छात्राः समाजसेवकाः च भागं गृहीतवन्तः। एषा प्रतियोगिता छात्राणां कृते चतुर्षु स्तरेषु आयोजिता आसीत्। बाल्यस्तरः षष्ठीतः अष्टमीपर्यन्तं, किशोरस्तरः ९ कक्षातः १२ पर्यन्तं, युवास्तरः महाविद्यालयस्तरे, प्रौढस्तरः स्नातकोत्तरस्तरे च। तथैव सामाजिकानां कृते सरलस्तरस्य उन्नतस्तरस्य च द्वयोः स्तरयोः आयोजनं कृतम् आसीत्। अस्याः अन्ताराष्ट्रीय- संस्कृत- ओलम्पियाड ऑनलाइन- परीक्षायाः परिणामः केन्द्रीय- संस्कृत- विश्वविद्यालयेन नवम्बर्-मासस्य ५ दिनाङ्के घोषितः। यस्यां मण्डीजनपदस्य बिजनढलवाने राजकीय- उच्च- विद्यालये सेवारत: संस्कृतशिक्षक: डॉ. मनोजकुमारशैल: सामाजिक- स्तरीय- प्रतियोगिताया: सरलस्तरे राष्ट्रीयस्तरे तृतीयपुरस्कारं प्राप्तवान्। सः हिमाचलतः एकमात्रशिक्षकः अस्ति यः एतत् पुरस्कारं प्राप्तवान्। पुरस्काररूपेण तेभ्यः प्रमाणपत्रं, केन्द्रीयसंस्कृतविश्वविद्यालयेन ५०००/- रूप्यकाणां नगदपुरस्कारः च दीयते।
संस्कृत-ओलम्पियाड-स्पर्धाया: बालस्तरे मुस्कान राज्यस्तरे प्रथमा
अस्याम् अन्ताराष्ट्रीयसंस्कृत- ओलम्पियाड- स्पर्धायां बालस्तरस्य किशोरस्तरस्य च राजकीय- उच्चविद्यालयस्य १२ छात्राः अपि भागं गृहीतवन्तः। बालस्तरस्य स्पर्धायां अस्यैव विद्यालयस्य सप्तमश्रेण्याः छात्रा मुस्कान राज्यस्तरस्य प्रथमपुरस्कारं प्राप्नोत्। अनेनैव बालस्तरे विद्यालयस्य छात्रा: ईशान: एवं गुंजन च श्रेष्ठप्रदर्शनं कृत्वा विद्यालयस्तरे द्वितीयं एवं तृतीयं स्थानं तथा किशोरस्तरे विद्यालयस्य छात्रा: विद्यालयस्तरे प्रिया, गौरव: एवं यामिनी क्रमशः प्रथमं द्वितीयं तृतीयं स्थानं प्राप्नुवन्। बिजन-ढलवानस्य राजकीय- उच्चविद्यालयस्य मुख्याध्यापिका मोनिकाठाकुर छात्राणां कृते एतस्यै उपलब्ध्यै शुभकामना: अयच्छत् अन्ताराष्ट्रीयसंस्कृत- ओलम्पियाड- स्पर्धायां राष्ट्रियस्तरस्य स्थानं प्राप्ते विद्यालयस्य शिक्षकाय मनोजकुमारशैलाय अपि शुभाशंसा: अददत्। सा अवदत् यत् विद्यालयस्य संस्कृतशिक्षकः मनोजकुमारः शिक्षया सह संस्कृतसम्बद्धेषु सर्वेषु कार्येषु सक्रियरूपेण भागं गृह्णाति, छात्रान् च प्रेरयति। फलतः अद्य विद्यालयस्य छात्राः राज्यस्तरीय- प्रतियोगितासु, अन्ताराष्ट्रीय- संस्कृत- ओलम्पियाड-स्पर्धासु च भागं गृह्णन्ति।
उपनिदेशकेन कृतम् अभिनदनम्
मण्डीजनपदस्य प्रारम्भिकशिक्षा-उपनिदेशक: विजयकुमार: गुप्ता राष्ट्रीयस्तरे तृतीयपुरस्कारस्य प्राप्त्यर्थं बिजन-ढलवानस्य राजकीय- उच्चविद्यालयस्य शिक्षकस्य मनोजकुमारशैलस्य अभिनदनं कृतवान्। सः अवदत् यत् एतत् मण्डीमण्डलस्य कृते गौरवस्य विषयः अस्ति। डॉ. मनोजकुमारशैलः संस्कृतक्षेत्रे प्रत्येकस्मिन् कार्ये सदैव अग्रणी अस्ति तथा च विद्यालयस्तरस्य संस्कृतभाषायां प्रार्थनासभायाः आरम्भे अपि तस्य प्रयत्नाः प्रशंसनीयाः अभवन्।
