भोपालपरिसरे ‘अखिलभारतीय-क्रीडा-सांस्कृतिक-शैक्षिक-स्पर्धानां सम्पन्नः समापनसमारोहः
हिमसंस्कृतवार्ताः, भोपालम्। केन्द्रीयसंस्कृतविश्वविद्यालयस्य भोपालपरिसरेण आयोज्यमानसु ‘अखिलभारतीय-क्रीडा-सांस्कृतिक-शैक्षिक-स्पर्धासु विगत-दिनद्वयात् चत्वारिंशत् प्रतियोगितानां प्रथम-द्वितीय-तृतीय-पुरस्कारप्रदानेन समापनसमारोहः सम्पन्नः ।
समापनसमारोहस्य प्रारम्भे एव भोपालपरिसरस्य सह-निदेशकाः प्रो. नीलाभतिवारी-महोदयाः कार्यक्रमेऽस्मिन् उपस्थितानामतिथीनां वाक्कुसुमैः स्वागतं कुर्वाणाः उक्तवन्तः यत् आभिः स्पर्धाभिः छात्राणां पञ्चविधविकासः भवति । अखिलभारतीय-क्रीडा-सांस्कृतिक-शैक्षिक-स्पर्धायाः संयोजकाः प्रो.भारतभूषणमिश्रा-महोदयाः दिनत्रयात्मककार्यक्रमस्य प्रतिवेदनं प्रास्तुवन् ।
कार्यक्रमस्यास्य मुख्यातिथयः प्रो. अभिराजराजेन्द्रमिश्र-महोदयाः, पूर्वकुलपतयः, सम्पूर्णानन्दसंस्कृतविश्वविद्यालयः, वाराणसी उक्तवन्तः यत् वर्तमानकाले संस्कृतशिक्षकानां छात्राणाञ्च मुख्यमुत्तरदायित्वमस्ति यत् ते शब्दज्ञानराशिः वर्धयेयुः। संस्कृतभाषया एव भारतं विश्वगुरुत्वं प्राप्तुं शक्नोति। अस्माकं शास्त्राणि उपनिषदः पुराणानि प्रत्यक्षप्रमाणानि सन्ति ।
कार्यक्रमस्य सारस्वतातिथयः प्रो. शिशिरकुमारपाण्डेय-महोदयाः, कुलपतयः, जगद्गुरुरामभद्राचार्यदिव्याङ्गराज्यविश्वविद्यालयः, चित्रकूटम् उक्तवन्तः यत् अध्यनेन सह पाठ्यसहगामिक्रियाः अत्यन्तानिवार्याः सन्ति अनया शारीरिकं मानसिकं सामञ्जस्यं संस्थापयितुं शक्यते । स्वस्थमनसः एव सर्वाणि कार्याणि सम्यक् रूपेण सम्पादयितुं शक्यते ।
कार्यक्रमस्य विशिष्टातिथयः प्रो. रा. गा. मुरलीकृष्ण-महोदयाः, कुलसचिवाः, केन्द्रीयसंस्कृतविश्वविद्यालयः, दिल्ली उक्तवन्तः यत् हर्षस्य विषयोऽयं यत् संस्कृतच्छात्राः शास्त्राध्ययनेन सह विभिन्नगतिविधिषु भागं स्वीकृत्य सर्वश्रेष्ठं प्रदर्शनं कुर्वन्ति । अधुना इयं स्पर्धा चतुर्षु वलयेषु सम्पन्ना भवति । अतः बहवः स्पर्धालवः भागं स्वीकुर्वन्ति । कार्यक्रमेऽस्मिन् सम्मानितातिथित्वेन डॉ.सत्यजीतपाण्डेय-महोदयाः समुपस्थिताः आसन् ।
समापनसमारोहकार्यक्रमस्य अध्यक्षाः केन्द्रीयसंस्कृतविश्वविद्यालयस्य भोपालपरिसरस्य निदेशकाः प्रो.रमाकान्तपाण्डेय-महोदयाः सर्वप्रथमम् अध्यक्षीयोद्वोधनेन उपस्थितेभ्यः सर्वेभ्यः प्रतिभागिभ्यः मार्गदर्शकेभ्यः आयोजनसमितिसदस्येभ्यः परिसरप्राध्यापकेभ्यश्च अभिनन्दनं कृतवन्तः । तथा चोक्तवन्तः यत् शास्त्रे यत् निहितं ज्ञानमस्ति तदस्माकं व्यवहारेऽपि आगच्छेत् तदैवास्माकं व्यक्तित्वं विकसति । आचार्यपाण्ड़ेयमहोदयाः विश्वविद्यालयस्य माननीयेभ्यः कुलपतिभ्यः प्रो. श्रीनिवासवरखेडी-महोदयेभ्यः अपि कृतज्ञतां समर्पयन् येषां सत्प्रेरणया एव विश्वविद्यालयपरिसरेषु एतादृशाः कार्यक्रमाः सम्पन्नाः भवन्ति। अवसरेऽस्मिन् भोपालपरिसरेण प्रकाशिता शोधपत्रिका लोकायार्पिता । मञ्चस्थैः अतिथिभिः मार्गदर्शकाः सम्मानिताः। पुरस्कारवितरणस्य घोषणा प्रो.धर्मेन्द्रकुमारसिंहदेव-महोदयेन कृता । समापनसत्रेऽस्मिन् धन्यवादज्ञापनं डॉ.मोहिनी-अरोड़ा-महोदया कृतवती तथा चास्य सत्रस्य सञ्चालनं प्रो.प्रदीपकुमारपाण्डेय-महोदयेन कृतम् । अवसरेऽस्मिन् नगरस्य विशिष्टविद्वान्सः सामाजिकाः तथा परिसरस्य सर्वेऽपि प्राध्यापकाः कर्मचारिणश्च समुपस्थिताः आसन् ।
प्रतियोगितानां परिणामः
केन्द्रीयसंस्कृतविश्वविद्यालयस्य जयपुरपरिसरः सप्तदश सुवर्णपदकम्, अष्टौ रजतपदकम् प्राप्य प्रथमस्थाने वर्तते ।
• केन्द्रीयसंस्कृतविश्वविद्यालयस्य भोपालपरिसरः अष्टौ सुवर्णपदकं नव रजतपदकं प्राप्य द्वितीये स्थाने अस्ति ।
• चोटीपुरा स्थितः श्रीमद्दयानन्द-कन्या-गुरुकुल-महाविद्यालयः सप्त सुवर्णपदकं चत्वारि रजतपदकं प्राप्य तृतीये स्थाने अस्ति ।
