Himachal Weather : हिमाचले मानसूनस्य आरम्भात् अधुनापर्यन्तं मेघविस्फोटस्य जलप्लावनस्य च ५१ घटनासु ३१ जनाः मृताः
हिमसंस्कृतवार्ता: – शिमला।
हिमाचलप्रदेशे मानसूनर्तौ २७ जूनतः १६ अगस्तपर्यन्तं मेघविस्फोटस्य जलप्रलयस्य च ५१ घटनासु ३१ जनाः मृताः। एषा सूचना राज्यस्य आपत्कालीनसञ्चालनकेन्द्रेण दत्ता। मानसूनः जूनमासस्य २७ दिनाङ्के हिमाचलप्रदेशं प्राप्तवान्। जूनमासस्य २७ दिनाङ्कात् अगस्तमासस्य १६ दिनाङ्कपर्यन्तं मेघविस्फोटस्य जलप्लावनस्य च ५१ घटनासु ३१ जनाः मृताः, ३३ जनाः अदृश्याः च। लाहौल-स्पीति-जनपदे एतादृशाः २२ घटनाः ज्ञाताः, ये राज्ये सर्वाधिकाः सन्ति, तदनन्तरं किन्नौरे ११, ऊनायां षट्, कुल्लू- मण्डी- जनपदयो: त्रीणि, सिरमौरे द्वौ, चम्बा- हमीरपुर-शिमला-सोलन-जनपदेषु एकैका: च घटनाः अभवन् तथ्यानुसारं १२१ गृहाणि पूर्णतया वा आंशिकरूपेण वा क्षतिग्रस्तानि अभवन्। राज्यस्य आपत्कालीन- सञ्चालनकेन्द्रेण उक्तं यत् अस्मिन् एव काले ३५ भूस्खलने त्रयः जनाः मृताः। मण्डीनगरे अधिकतमं नव भूस्खलनं जातम्। किन्नौर- शिमला-जनपदयोः षट्-षट्, लाहौल-स्पीति- चम्बाजनपदयोः चत्वारि, सोलने त्रीणि, कुल्लौ द्वौ, बिलासपुरे एकः च भूस्खलनानि अभवन्। अन्येषां मण्डलानां दत्तांशः उपलब्धः नास्ति। परन्तु अनेकजनपदेषु निवासिनः विश्वासं कृतवन्तः यत् मेघविस्फोटस्य, आकस्मिकजलप्रलयस्य, भूस्खलनस्य च घटनानां संख्या आधिकारिकाङ्कानां अपेक्षया बहु अधिका अस्ति। इदानीं राज्यस्य केषुचित् भागेषु लघुवृष्टिः अभवत्, रविवासरस्य प्रातः पर्यन्तं ९५ मार्गाः निरुद्धा: अभवन्। अधिकारिणां मते हिमाचलप्रदेशस्य अद्यावधि ११४० कोटिरूप्यकाणां हानिः अभवत्, यत्र सर्वाधिकं हानिः मार्गसंरचनायाः अभवत्। लोकनिर्माणविभागस्य ५०२ कोटिरूप्यकाणां हानिः अभवत्, तदनन्तरं जलशक्तिविभागस्य (४६९ कोटिरूप्यकाणां) उद्यानविभागस्य (१३९ कोटिरूप्यकाणां) च क्षतिः अभवत्। स्थानीय ऋतुविभागेन राज्यस्य विभिन्नेषु क्षेत्रेषु अगस्तमासस्य २१ दिनाङ्कपर्यन्तं प्रचण्डवृष्टेः ‘पीतवर्णीया’ सचेतना प्रसारिता अस्ति।
