मण्ड्यां ‘लोकतन्त्रं रक्षत, अराजकताम् अपसारयत’ इति पदयात्रया भाजपा-दलस्य शक्तिप्रदर्शनम्
हिमसंस्कृतवार्ता — मण्डी।
भाजपा-दलेन बुधवासरे मण्ड्यां ‘लोकतन्त्रं रक्षत, अराजकताम् अपसारयत’ इति पदयात्रायाः माध्यमेन स्वकीयशक्तेः प्रदर्शनं विहितम्। पड्डल-क्रीडाङ्गणात् प्रारब्धायाम् अस्यां पदयात्रायां भाजपा-दलस्य ज्येष्ठाः नेतारः, विधायकाः, विपुलायां संख्यायां कार्यकर्तारश्च सहभागिनः अभवन्। सर्वे नेतारः कार्यकर्तारश्च पादचारेण सञ्चरन्तः नगरस्य विविधमार्गेभ्यः गत्वा सेरी-मञ्चं प्राप्नुवन्। दीर्घकालानन्तरं मण्ड्यां भाजपा-दलस्य एतावती विशाला जनसभा दृष्टा। पदयात्रायाः अन्तराले कार्यकर्तृभिः दलस्य समर्थनार्थं जयघोषाः कृताः, यदा तु सेरी-मञ्चे प्रधानमन्त्रिणः नरेन्द्रमोदिनः समर्थनार्थं प्रतिध्वनद्भिः उद्घोषैः कार्यक्रमे नूतनः उत्साहः सञ्चारितः।
पदयात्रायां प्रतिपक्षनेता पूर्वमुख्यमन्त्री च जयरामठाकुरः, पूर्वमन्त्री सुरेशभारद्वाजः, यात्रायाः संयोजकः सुन्दरनगरस्य विधायकः राकेशजम्वालः, विधायकः इन्द्रसिंहगान्धी, द्रङ्ग-क्षेत्रस्य विधायकः पूर्णचन्दठाकुरः, करसोगस्य विधायकः दीपराजः, विधायकः प्रकाशराणा, भाजपा-मण्डलाध्यक्षः निहालचन्दः, पूर्वमन्त्री गोविन्दठाकुरश्च सहिताः दलस्य अनेके ज्येष्ठाः नेतारः उपस्थिताः आसन्।
*सदर-विधायकस्य संसत्सदस्यायाश्च अनुपस्थितिः चर्चायाः विषयः अभवत्*
अस्मिन् राजनैतिक-आयोजने मण्डी-सदर-क्षेत्रस्य विधायकस्य अनिलशर्मणः मण्डी-संसदीयक्षेत्रस्य संसत्सदस्यायाः (सांसद) कङ्गना-रणौत-महोदयायाश्च अनुपस्थितिः चर्चायाः विषयः अभवत्। ज्ञायते यत् सदर-विधायकः अनिलशर्मा विधानसभा-समित्याः अध्यक्षत्वेन केरल-राज्यस्य प्रवासे वर्तते। यद्यपि तस्य स्थाने तस्य सुपुत्रः आश्रयशर्मा किञ्चित् कालं यावत् पदयात्रायां सम्मिलितः अभवत्। आश्रयशर्मा सेरी-मञ्चेऽपि किञ्चित् कालं यावत् उपविष्टवान्, किन्तु कार्यक्रमस्य मध्ये एव ततः प्रस्थितवान्।
*जयरामठाकुरेण काङ्ग्रेस-दलम् अभिलक्ष्य प्रहारः कृतः*
सेरी-मञ्चे आयोजितायां सभायां प्रतिपक्षनेत्रा कार्यक्रमस्य मुख्यातिथिना जयरामठाकुरेण सहैव भाजपा-दलस्य अन्यैः ज्येष्ठनेतृभिः काङ्ग्रेस-सर्वकारम् अभिलक्ष्य तीक्ष्णाः आघाताः विहिताः। वक्तृभिः प्रदेशस्य काङ्ग्रेस-सर्वकारस्य कार्यप्रणाल्याम् उपरि प्रश्नाः उत्थापिताः। अस्मिन् अन्तराले राहुल-गान्धी काङ्ग्रेस-दलस्य राष्ट्रियाध्यक्षः मल्लिकार्जुनखडगे च अपि भाजपा-नेत्तॄणां लक्ष्यान्तर्गतौ आस्ताम्। भाजपा-नेतारः अवदन् यत् लोकतन्त्रस्य हत्या तु काङ्ग्रेस-दलेन एव कृता आसीत्, अद्यापि च काङ्ग्रेस-दलं देशे अराजकतां प्रसारयितुम् इच्छति।
