संस्कृतभारत्याः पूर्वोत्तरक्षेत्रस्य चिन्तनगोष्ठी प्रयागे सम्पन्ना
वार्ताहर: आचार्यदीनदयालशुक्ल:
प्रयागराज। पूर्वोत्तरप्रदेशक्षेत्रस्य संस्कृतभारत्या अतीव प्रमुखा वैचारिकदृष्ट्या प्रखरा दिशाबोधिका च गोष्ठी सगौरवम् आयोजिता अभवत्। अस्याः बौद्धिकसमवेतायाः प्रधानं लक्ष्यं संस्कृतभाषायाः संरक्षणाय संवर्धनाय सार्वजनीनप्रसाराय च दीर्घकालिकीं सुनियोजितां क्रियान्वयनयोग्यां च कार्यनीतिं निर्मातुम् आसीत्। अवसरेऽस्मिन् उपस्थिताः विद्वज्जनाः सङ्घटनस्य दायित्वधारिणश्च संस्कृतं कथं पुनः लोकजीवनस्य प्राणभूता भाषा भवेत् इति विषये गभीरं चिन्तितवन्तः।
गोष्ठ्यां सर्वसम्मतः अयं मतः प्राकट्यं गतः यत् संस्कृतं केवलं शास्त्रीयग्रन्थेषु अकादमिकपरिसरेषु औपचारिकेषु अध्ययनेषु वा सीमयितुं तस्याः गौरवान्वितपरम्परास्वरूपेण सह अन्यायः भविष्यति। आवश्यकता तु इयमस्ति यत् संस्कृतं व्यावहारिकजीवनेन सामाजिकसंवादेन सांस्कृतिकचेतनया नैतिकमूल्यैः आधुनिकविज्ञानेन तान्त्रिकमाध्यमैश्च सह समन्वयं साधयित्वा जनमानसेन योजनीयम्। संस्कृतशिक्षणस्य सहजाः संवादप्रधानाः आकर्षिकाश्च पद्धतयः बालकयुवकेन्द्रितानि संस्कारात्मकानि अभियानानि संस्कृतसम्भाषणशिबिराणि तथा ग्रामनगरस्तरेषु संस्कृतसंस्कारकेन्द्राणां स्थापनं विस्तारश्च इत्येतेषु विषयेषु गहनो विमर्शो जातः।
संस्कृतभारत्याः अखिलभारतीयसङ्गठनमन्त्रिणः जयप्रकाशगौतमवर्याणां कुशले दूरदर्शिनि प्रेरणादायिनि च नेतृत्त्वे आयोजितायाम् अस्यां वैचारिकगोष्ठ्यां क्षेत्रीयसङ्गठनमन्त्री पण्डितप्रमोदः पूर्वोत्तरप्रदेशस्य क्षेत्रीयसम्पर्कप्रमुखः जितेन्द्रप्रतापसिंह: अवधप्रान्तस्य अध्यक्षः चन्द्रभूषणत्रिपाठि: कर्णपुरप्रान्तस्य मन्त्री डॉ.रत्नेशत्रिवेदि:, अध्यक्षः प्रो.रामनारायणद्विवेदि: मन्त्री नागेशपाण्डेय: काशीप्रान्तस्य सहमन्त्री सालिगरामत्रिपाठिश्चेत्येतेषां दायित्वधारिणाम् उल्लेखनीया सार्थका सक्रिया च सहभागिता आसीत्। सर्वे दायित्वधारिणः पूर्वोत्तरप्रदेशक्षेत्रस्य आगामिकार्ययोजनासु सङ्घटनपुनर्निर्माणे कार्यकर्तृप्रशिक्षणे जनसम्पर्कसुदृढीकरणे संस्कृतस्य जनान्दोलनस्वरूपप्रदाने च सम्बद्धेषु विषयेषु विस्तरेण परिचर्चितवन्तः गभीरं च विमृष्टवन्तः।
इयं गोष्ठी प्रयागे अतीव अनुशासिते सौहार्दपूर्णे वैचारिके च वातावरणे औपचारिकरूपेण सम्पन्ना अभवत् यस्याः अध्यक्षतां संस्कृतभारत्याः अखिलभारतीयसङ्गठनमन्त्री जयप्रकाशगौतमवर्य: अकरोत्। उपवेशनस्यान्ते उपस्थिताः सर्वे पदाधिकारिणः कार्यकर्तारश्च सङ्घटनात्मिकाम् एकात्मतां भूयो दृढीकर्तुं संस्कृतभारत्याः उद्देश्यानि समाजस्य अन्तिमजनं यावत् प्रापयितुं संस्कृतस्य पुनर्जागरणञ्च राष्ट्रीयचेतनायाः अभिन्नम् अङ्गं निर्मातुं सामूहिकं सङ्कल्पं व्यञ्जितवन्तः।
