सऊदी अरबस्य द्विदिवसीय-यात्रायां प्रस्थास्यति प्रधानमंत्री नरेन्द्रमोदी

सऊदी अरबस्य द्विदिवसीय-यात्रायां प्रस्थास्यति प्रधानमंत्री नरेन्द्रमोदी
हिमसंस्कृतवार्ता: – प्रधानमंत्री नरेन्द्रमोदी सऊदी अरबस्य राजकुमारस्य प्रधानमन्त्रिणश्च मोहम्मद बिन-सलमानस्य निमन्त्रणे मंगलवासरे सऊदी अरबस्य द्वि दिवसीय यात्रायां प्रस्थास्यति। विदेशमन्त्रालयेन एकस्मिन् वक्तव्ये प्रतिपादितं यत् षोडशोत्तर-द्वि-सहस्र-तम-वर्षात्, एकोनविंशत्युत्तर-द्वि-सहस्र-तम-वर्षादनन्तरं च प्रधानमन्त्रिण: मोदिन: सऊदी अरबस्य एषा तृतीया यात्रा भविष्यति। इतः पूर्वं त्रयोविंशत्युत्तर-द्वि-सहस्र-तम-वर्षस्य सितंबरमासे मोहम्मद बिन सलमानः जी-विंशतिः शिखर सम्मेलने भागं भजितुं राजकीय-यात्रायां नवदिल्लीं समागतः आसीत्। अमुना भारत-सऊदी-अरब-कार्यनीतिक – सहभागिता-परिषदः प्रथमम् उपवेशनमपि सहाध्यक्षितम् आसीत्। भारतस्य सऊदी अरबस्य च सामाजिक-सांस्कृतिक- व्यापारिक सम्बन्धानां सुदीर्घः इतिहासः वर्तते। उभयोः देशयोः मध्ये घनिष्ठः मित्रतापूर्णः संबंधः अस्ति। कार्यनीतिक साहमत्ययुतेन मित्र-राष्ट्र-रूपेण द्वयो: देशयोः मध्ये राजनीतिक-रक्षा-सुरक्षा, व्यापार-निवेश-ऊर्जा-प्रौद्योगिकी-स्वास्थ्य-शिक्षा-संस्कृत-सहितेषु विभिन्नेषु क्षेत्रेषु सुदृढः द्विपक्षीयः संबंधः अस्ति। विगते दशके सऊदी अरबेन साकं भारतस्य संबन्धाः इतोऽपि सुदृढाः जाताः सन्ति। प्रधानमन्त्रिण: नरेन्द्रमोदिन: यात्रा दर्शयति यत् भारतं, सऊदी अरब-देशेन साकं स्वीय-द्विपक्षीय सम्बन्धान् महत्त्वपूर्णान् मनुते। अनया यात्रया देशद्वयस्य मध्ये बहुक्षेत्रीय-सहभागिता इतोऽपि सुदृढा भविष्यति, अथ च परस्परं हितसाधनस्य विभिन्नक्षेत्रीय-विषयाणां अन्ताराष्ट्रिय प्रकरणानां च विचाराणामपि आदान-प्रदानं भविष्यति।