Shimla News : मुख्यमन्त्री ढली- बसस्थानकस्य उद्घाटनम् अकरोत्, शाकविपण्या: आधुनिकीकरणमपि भविष्यति
हिमसंस्कृतवार्ता: – शिमला।
मुख्यमन्त्री सुखविन्दरसिंहसुक्खुः सोमवासरे शिमलानगरे १३.२५ कोटिरूप्यकाणां व्ययेन नवनिर्मितं ढलीबसस्थानकं जनसामान्यं समर्प्य तस्य निरीक्षणमपि कृतवान्। मीडियाभिः सह वार्तालापं कुर्वन् मुख्यमन्त्री अवदत् यत् पूर्वभाजपासर्वकारेण केवलं निर्वाचनप्रयोजनार्थं विना किमपि बजटम् अस्य बसस्थानकस्य आधारशिला स्थापिता आसीत्, ठियोगबसस्थानकस्य अपि तथैव कृतम्। सः अवदत् यत् वर्तमानकाङ्ग्रेससर्वकारेण गतवर्षे अस्मिन् वर्षे च प्रत्येकं ५ कोटिरूप्यकाणि मुक्तं कृत्वा १३ कोटिरूप्यकाणां व्ययेन निर्माणकार्यं सम्पन्नम्। मुख्यमन्त्री उक्तवान् यत् हिमाचल- पथ- परिवहननिगमस्य आधुनिककार्यशाला अपि अत्र २४ कोटिरूप्यकाणां व्ययेन निर्मितं भवति, यस्याः कार्यं शीघ्रमेव सम्पन्नं भविष्यति। सः अवदत् यत् पूर्वभाजपासर्वकारेण द्विगुण शक्ति- (डबलइञ्जन)- सर्वकारस्य नामधेयेन राज्यस्य जनानां विश्वासघातः कृतः। सः केवलं निर्वाचने विजयं प्राप्तुं ५००० कोटिरूप्यकाणां हस्तपत्राणि वितरितवान् परन्तु राज्यस्य प्रबुद्धजनाः तं सत्तातः निष्कासितवन्तः। सः अवदत् यत् वर्तमानराज्यसर्वकारः बजटे समुचितं प्रावधानं कृत्वा एव विकासात्मकपरियोजनानां आधारशिलां स्थापयति, एतानि अपि समयनिर्धारितरूपेण सम्पन्नं क्रियन्ते। मुख्यमन्त्री ढलीस्थाने ३६ कोटिरूप्यकाणां व्ययेन शाकविपण्या: आधुनिकीकरणकार्यस्य आधारशिला अपि अस्थापयत्। सः अवदत् यत् एकमासान्तरे विपण्या: आधुनिकीकरणकार्यं आरभ्य १८ मासेषु कार्यं सम्पन्नं भविष्यति। सः अवदत् यत् शिमलानगरे अपि शीतभण्डारस्य निर्माणं भविष्यति।
