संस्कृतभारती-राज्यस्तरीयशलाकापरीक्षायाः उद्घाटनसमारोहः
संस्कृतभारतीहिमाचलप्रदेशन्यासद्वारा श्रीसुन्दरनारायणगुरुकुलम् अम्बेहडा, ऊना इत्यत्र अक्टूबरमासस्य अष्टादशनवदशदिनाङ्कयोः समायोज्यमानायाः राज्यस्तरीयशलाकापरीक्षायाः अद्य 18.10.2024 तमे दिनाङ्के सायङ्काले 7:00 वादने उद्घाटनसमारोहः समायोजितः । समुपस्थितैः अतिथिभिः कार्यक्रमस्य शुभारम्भः दीपप्रज्ज्वालनेन कृतः। शास्त्रसंरक्षणाय शास्त्रसंवर्धनाय च संस्कृतभारतीहिमाचलप्रदेशन्यासद्वारा अम्बेहडास्थिते श्रीसुन्दरनारायणगुरुकुले द्विदिवसीयायाः शलाकापरीक्षायाः समायोजनं क्रियमाणम् अस्ति । गतवर्षारभ्य व्याकरण-ज्योतिष-गीता-अमरकोषादीन् शास्त्रीयविषयान् आधारीकृत्य राज्यस्तरीया शलाकापरीक्षा आयोज्यमाना अस्ति । अस्मिन् वर्षे लघुसिद्धान्तकौमुदी-अमरकोष-गीता-ज्योतिष-अष्टाध्यायीत्यादिषु पञ्चसु विषयेषु एषा शलाकापरीक्षा भूयमाना अस्ति । यस्यां सम्पूर्णस्य हिमाचलप्रदेशस्य प्रायेण सर्वजनपदानां विविधशिक्षणसंस्थानानां शताधिकाः छात्राः भागं गृह्णन्तः सन्ति ।
शलाकापरीक्षायाः उद्घाटनसमारोहे अद्य मुख्यातिथिरूपेण केन्द्रीयसंस्कृतविश्वविद्यालयस्य वेदव्यासपरिसरबलाहरस्य निदेशिका प्रो.सत्यमकुमारीवर्या, अध्यक्षरूपेण श्रीसुन्दरनारायणगुरुकुलस्य संस्थापकः प्रसिद्धः कथावाचकः आचार्यः शिवकुमारवर्यः, मुख्यवक्तृरूपेण संस्कृतभारत्याः उत्तरक्षेत्रसंघटनमन्त्री श्रीमान् नरेन्द्रवर्यः सारस्वतातिथिरूपेण च प्रसिद्धः उद्योगपतिः श्रीमान् योगेशवर्यः इत्येते उपस्थिताः आसन् ।
उद्घाटनसत्रे शलाकापरीक्षायाः प्रान्तसंयोजकः आचार्यः डॉ.जयकृष्णवर्यः सर्वेषां स्वागतं व्याहरन् परीक्षायाः अस्याः प्रास्ताविकं प्रास्तौत् । तदनु मुख्यवक्तृरूपेण समुपस्थितः श्रीमान् नरेन्द्रमहोदयः स्ववचोभिः समेषां मार्गदर्शनम् अकरोत् । एतदनु सारस्वतातिथिरूपेण समुपस्थितेन प्रसिद्धेन उद्योगपतिना श्रीमता योगेशवर्येण अवसरे अस्मिन् विशिष्टकार्याय शुभकामनाः प्रकटीकृताः । मुख्यातिथिरूपेण समुपस्थिता प्रो.सत्यमकुमारीवर्या सर्वेषाम् अभिनन्दनं कुर्वन् शास्त्रपरम्परायाः महत्त्वं प्रत्यपादयत् ।
गुरुकुलस्यास्य संस्थापकः आचार्यः कार्यक्रमाध्यक्षः प्रसिद्धः कथावाचकः आचार्यः शिवकुमारवर्यः कार्यक्रमस्यास्य आयोजनं गुरुकुले जायमानम् अस्ति इत्यर्थं प्रसन्नतां प्रकटितवान् उक्तवान् च आगामिनि काले मुहुर्मुहुः एवंभूतानां कार्यक्रमाणां समायोजनं स्थाने एतस्मिन् भवेत् इत्याग्रहपूर्वकं समेषां पुरतः आह्वानं कृतवान् ।
अवसरे अस्मिन् प्रान्तस्य, विभागानां, विविधजनपदानां, खण्डानां च अनेके दायित्ववन्तः कार्यकर्तारः समाजस्य स्थानीयाः ज्येष्ठाः गणमान्याः संस्कृतप्रेमिणः च उपस्थिताः आसन् ।
द्विदिवसीयशलाकापरीक्षायां निर्णायकरूपेण हिमाचलम् अतिरिच्य भारतस्य विविधेभ्यः उत्तराखण्ड-पञ्जाबादिभ्यः विविधशास्त्रविद्वांसाः उपस्थिताः अभूवन् ।
शलाकापरीक्षायाः सहसंयोजिका डॉ.के.मनोज्ञावर्या कार्यक्रमस्य सञ्चालनम् अकरोत् ।
शलाकापरीक्षासमितिसदस्यः आचार्यः डॉ.यज्ञदत्तशर्ममहोदयः समेषाम् उपस्थितानां धन्यवादम् अकरोत् । शान्तिमन्त्रेण कार्यक्रमः सुसम्पन्नः ।
वार्ताप्रेषकः
प्रान्तप्रचारप्रमुखः
दूरभाषः 9619013708
