Bhisham Project : हिमाचले यत्र महती आपदा; तत्र चिकित्सालयः प्राप्स्यति, अष्टनिमेषेषु भविष्यति चिकित्सा
हिमसंस्कृतवार्ता: – बिलासपुरम्।
हिमाचले मेघविस्फोटस्य, जलप्रलयस्य वा अन्यस्य प्राकृतिकविपदायाः कारणेन मार्गाः निरुद्धा: भवन्ति चेत् पीडितानां चिकित्सायाः वञ्चनं न भविष्यति। आपदापीडितानां कृते स्थले एव समये चिकित्सा भविष्यति। पीडितानां चिकित्सायै चिकित्सालयं गन्तुं न प्रयोजनं भविष्यति, अपि तु चिकित्सालयः एव तेषां समीपम् आगमिष्यति। एतत् केन्द्रसर्वकारस्य परियोजना भीष्मद्वारा सम्भवं भविष्यति। कस्यापि प्रकारस्य आपदि जनानां कृते समुचितसमये स्थले एव चिकित्सां कर्तुं केन्द्रसर्वकारेण अस्याः परियोजनायाः अन्तर्गतं राज्यस्य बिलासपुरस्य अखिलभारतीय- आयुर्विज्ञासंस्थानम् (एम्स) समाविष्टम् अस्ति। बिलासपुरस्य एम्स-इति देशस्य प्रथमं स्वास्थ्यसंस्थानम् अस्ति यद् परियोजनया सह सम्बद्धः इति विश्वास: क्रियते।
परियोजनायाः अन्तर्गतम् अखिलभारतीय- आयुर्विज्ञासंस्थानम् उत्तमस्वास्थ्यसेवाप्रदानार्थं आरोग्यमैत्री इत्यस्य सुविधां ग्रहीष्यति। अखिलभारतीय- आयुर्विज्ञासंस्थानस्य चिकित्साधीक्षक: डॉ. दिनेशवर्मा बिलासपुरस्य बचतभवने उपायुक्तस्य अध्यक्षतायां आयोजितायां आपदा- प्रबंधनसभायां एतद् प्रकटितवान्। डॉ. दिनेशः अवदत् यत् एम्सः परियोजनायां सम्मिलितः अभवत्, अधुना राज्ये कुत्रापि आपदा सति केवलं अष्टनिमेषेषु तत्र चिकित्सालयः सज्जीकृत्य रोगिणां चिकित्सा आरब्धुं शक्यते। एतत् लाभप्रदं भविष्यति यत् कोऽपि आपदापीडितः चिकित्सायाः अभावात् न म्रियते। अखिलभारतीय- आयुर्विज्ञासंस्थानस्य चिकित्सकेभ्य: प्रशिक्षणं दत्तम् अस्ति। पेटीकासु स्थापितानि चिकित्सालयस्य वस्तूनि मासत्रयानन्तरं बिलासपुरं प्राप्स्यन्ति।
एवं निर्मितः भविष्यति चिकित्सालयः, युगपत् २०० जनानां चिकित्सा भविष्यति
परियोजना-भीष्मस्य अन्तर्गतम् एम्सबिलासपुराय ७२० किलोभारस्य ३६ पेटिका: प्राप्ता: भविष्यन्ति। तस्मिन् सर्वाणि चिकित्सालयस्य वस्तूनि उपस्थितानि भविष्यन्ति। एता: पेटिका: चक्रविमानस्य साहाय्येन आपदास्थलं प्रति प्रस्थापयिष्यन्ते। एतासां पेटिकानां विशेषता अस्ति यत् एता: महता ऊर्ध्वतः पातिताः चेत् न भग्नाः भवन्ति न च जलेन प्रभाविताः भवन्ति। ३६ पेटीका: स्थानं प्राप्तवति ततः परं ८ निमेषेषु चिकित्सालयं सज्जीकृत्य रोगिणां चिकित्सा आरब्धुं शक्यते। अत्र २०० जनानां चिकित्सासुविधाः भविष्यन्ति। तस्मिन् एव काले अस्मिन् शल्यक्रियागृहात् आरभ्य एक्स- रे- वेण्टिलेटर-पर्यन्तं सुविधाः अपि भविष्यन्ति। रक्तस्य प्रतिरूपाणि अपि ग्रहीतुं शक्यन्ते।
“परियोजनां प्राप्य बिलासपुरसहितं राज्यस्य अन्येभ्य: जनपदेभ्य: अपि प्रत्यक्षलाभः भविष्यति। एम्स इत्यनेन आपद: निवारणाय पृथक् एस. ओ. पी. सज्जीकृता, एतत् प्रशंसनीयं सोपानम् अस्ति। अखिलभारतीय- आयुर्विज्ञानसंस्थानस्य नियन्त्रणकक्षं प्रत्यक्षतया जिला आपदाप्रबन्धनस्य नियन्त्रणकक्षेण सह सम्बद्धं भविष्यति येन कस्यापि प्रकारस्य आपदि सूचनाः सज्ञकर्तुं शक्यन्ते।”
-आबिदहुसैन सादिक: उपायुक्त:, बिलासपुरम्
