CM Sukhu : डाडासीबा नागरिकचिकित्सालयस्य क्षमता १०० शय्याः यावत् वर्धिता भविष्यति : मुख्यमन्त्री सुखविंदरसिंहसुक्खु:
हिमसंस्कृतवार्ता: – कांगड़ा।
मुख्यमंत्री सुखविंदरसिंहसुक्खु: रविवासरे कांगड़ाजनपदस्य जसवां- प्रागपुरविधानसभाक्षेत्रस्य अंतर्गतं निर्माणाधीनस्य डाडासीबा नागरिकचिकित्सालयस्य निरीक्षणं कृत्वा अधिकारिभ्य: आवश्यकान् निर्देशान् अददत्। सः लोकनिर्माणविभागेन निर्माणकार्यस्य गुणवत्तां सुनिश्चितं कर्तुं आह। मुख्यमन्त्री उक्तवान् यत् प्रथमचरणे एतत् चिकित्सालयं ५० शय्याभिः सह निर्मितं भवति, द्वितीयचरणस्य क्षमता १०० शय्याः यावत् वर्धिता भविष्यति। सः अवदत् यत् एषा जसवांक्षेत्रस्य प्रमुखा सर्वकारीयस्वास्थ्यसंस्था अस्ति, अस्य क्षेत्रस्य जनानां कृते सेवां प्रददाति, अतः चिकित्सालये न्यूनता: अपसार्यन्ते । सः अवदत् यत् अस्य चिकित्सालयस्य प्रायः ५० प्रतिशतं निर्माणं सम्पन्नम् अस्ति, अवशिष्टं निर्माणकार्यं सम्पन्नं कर्तुं ३.६१ कोटिरूप्यकाणां आवश्यकता वर्तते, यत् राज्यसर्वकारः शीघ्रमेव प्रदास्यति। एतेन सह अत्र स्त्रीरोगविज्ञानस्य, अस्थिरोगविज्ञानस्य, शल्यचिकित्सायाः, संज्ञाहरणस्य च विशेषज्ञवैद्याः अपि च प्रयोगशालायाः तकनीकीकर्मचारिणः अपि नियोजिताः भविष्यन्ति। सः अवदत् यत् राज्यसर्वकारः डाडासीबा-चिकित्सालयम् आदर्शस्वास्थ्यसंस्थां करिष्यति।
मुख्यमन्त्री उक्तवान् यत् विगतपञ्चवर्षेभ्यः डाडासीबा- नागरिक- चिकित्सालयस्य निर्माणकार्यं मन्दगत्या प्रचलति, तस्य त्वरितीकरणस्य आवश्यकता वर्तते। सः अवदत् यत् राज्यसर्वकारः राज्यस्य सर्वेषु स्वास्थ्यसंस्थानेषु उत्तमसुविधाः प्रदातुं विशेषप्राथमिकताम् अयच्छत्, अस्यां दिशि सकारात्मकानि पदानि क्रियन्ते। सः अवदत् यत् अधुनैव एव आयोजितायां राज्यमन्त्रिमण्डलस्य सभायां स्वास्थ्य- परिवार- कल्याणविभागे चिकित्सापदाधिकारिणां २०० पदानि पूरयितुं निर्णयः कृतः। एतदतिरिक्तं राज्यस्य विभिन्नेषु चिकित्सामहाविद्यालयेषु प्राध्यापक- सह- आचार्य- सहायक-आचार्याणां २२ पदानि पूरयिष्यन्ते।
सः अवदत् यत् राज्यसर्वकारः आपत्कालीनस्वास्थ्यसेवासु उन्नयनं कर्तुं अपि प्रयत्नाः कुर्वन् अस्ति। मुख्यमन्त्री उक्तवान् यत् टाण्डा-नगरस्य डा.राजेन्द्रप्रसाद-चिकित्सा-महाविद्यालये आपत्कालीन-चिकित्साधिकारिणाम् अष्टपदानि पूरयिष्यन्ते। तदतिरिक्तं पण्डितजवाहरलालनेहरू चिकित्सामहाविद्यालये चम्बायां सहायकाचार्यस्य पञ्च पदानि पूरयिष्यन्ते, येन एतयोः चिकित्सामहाविद्यालययोः आघातकेन्द्राणि कार्यात्मकानि कृत्वा जनानां कृते सुविधाः प्रदातुं शक्यन्ते।
