ईरान-देशीय-वायवीयोड्डयनक्षेत्रे भारतीयविमानानाम् उड्डयनम् एयर-इंडिया-समवायेन प्रतिषेधितम्
ईरान-इजरायलयो: मध्ये युद्धस्य स्थिति: समुत्पन्ना वर्तते। तस्याः युद्धस्थिते: प्रभाव: भारतेऽपि दृष्टिपथम् आयाति। पश्चिमीक्षेत्रे युद्धस्य अवस्थां निभाल्य एयर- इंडिया- समवायेन सुरक्षादृशा निजविमानचालका: निर्देशिता: सन्ति यत् ते ईरान देशीयोड्डयनाकाशक्षेत्रे विमानानि नैव प्रवेशयेयुः। यात्रिजनानां सुरक्षादृशा एष: निर्णय: अभिस्वीकृत: अस्ति। एतदर्थम् अपरेण वायवीयमार्गेण यात्रिजना: तेषां गंतव्यं यावत् प्रापयिष्यन्ते।
अवधेयमस्ति यत् ईरान-इजरायल-देशयो: मध्ये युद्धस्य स्थिति: समुत्पाद्यमना अस्ति। स्रोतांसि तु एतदपि प्रतिपादयन्ति यद् आगामि-चतुर्विंशति: होराभ्यन्तरे उभयो: देशयो: मध्ये भीषणं युद्धं प्रारप्स्यते इति। अत: एतादृश्यां सङ्कटापन्नायां दशायाम् ईरानदेशीय वायुमार्गीयक्षेत्रस्य उपरि उड्डयनम् एयर इंडिया समवायेन साकं यात्रिजनानां कृतेऽपि सङ्कटपूर्णमेव भवितुं शक्नोति। तेनैव कारणेन लन्दनम्प्रति उड्डीयमानेन विमानेन ईरानदेशीय वायुमार्गीयक्षेत्रमपहाय सुदीर्घ: लम्बायमान: वायवीय: मार्ग: अभिस्वीकृत:। अनेन पथा यात्रिका: जनाः होरद्वयस्य विलम्बेन नैजं गन्तव्यं यावत् प्राप्स्यन्ति। किन्तु प्राणरक्षाया: उपायत्वेन सर्वै: यात्रिकै: जनसामान्यैश्च एष: निर्णय: नितरां श्लाघ्यते।
