CM Sukhu – जनसमस्यानां समयेन निराकरणं सर्वकारस्य प्राथमिकता।
हिमसंस्कृतवार्ता- कार्यालयीय: प्रतिनिधि:।
सिरमौरमण्डलस्य शिलाई विधानसभाक्षेत्रे विशालजनसभां सम्बोधयन् मुख्यमन्त्री सुखविन्दरसिंहसुक्खुः उक्तवान् यत् जनसमस्यानां समये निराकरणं तस्य प्राथमिकता अस्ति, राजनैतिकहितसेवायै समस्यानां स्थगितीकरणे सः विश्वासं न करोति। मुख्यमन्त्री उक्तवान् यत् राज्यस्य काङ्ग्रेससर्वकारः सामान्यजनेभ्य: आश्रयं दातुं समये एव निर्णयान् गृह्णाति। सः अवदत् यत् निर्णयाः विचारपूर्वकं क्रियन्ते, न तु निर्वाचनलाभार्थम् अपितु जनहिताय।
सः अवदत् यत् सः स्वयमेव सामान्यपरिवारस्य अस्ति, सामान्यजनानाम् समस्यानां समाधानार्थं कल्याणकारी योजनाः निर्मातुं तस्य प्रयासः अस्ति। सः अवदत् यत् राज्यसर्वकारः समाजस्य सर्वेषां वर्गानां हिताय कार्यं कुर्वन् अस्ति। जनानाम् आशीर्वादेन सर्वान् विघ्नान् अतिक्रम्य अस्मिन् दिशि सकारात्मकानि पदानि क्रियन्ते। सः अवदत् यत् अस्माभिः कृताः प्रतिज्ञाः पूर्णाः भवन्ति, आर्थिकस्थितौ उन्नयनं कृत्वा जनकल्याणस्य मार्गं प्रशस्तं कर्तुं प्रयत्नाः क्रियन्ते।
मुख्यमंत्री सुक्खुः उक्तवान् यत् राज्यसर्वकारः अपि भ्रष्टाचारस्य उन्मूलनार्थं दिवारात्रौ कार्यं कुर्वन् अस्ति। युवानां कृते प्राधान्ययुक्तं रोजगारं प्रदातुं भ्रष्टाचारस्य पर्यायः जातः हिमाचलप्रदेशस्य अधीनस्थकर्मचारिचयन- आयोगः हमीरपुरं विघट्य भ्रष्टाचारिणां विरुद्धं वैधानिकी कार्यविधि: अपि कृता। एकतः राज्यसर्वकारः युवानां योग्यतानुसारं जीविकां प्रदातुं प्रतिबद्धः अस्ति, अपरतः ६८० कोटिरूप्यकाणां राजीवगान्धी स्वरोजगार- प्रारम्भयोजना, हिमगंगायोजना सौरऊर्जा च इत्यादिभिः योजनाभिः युवानां कृते उत्तमजीविकाया: अवसरान् प्रदातुं प्रतिबद्धः अस्ति।
सः अवदत् यत् गतवर्षस्य वर्षर्तुविपदायाः पीडितानां कृते संबलं दातुं राज्यसर्वकारेण आश्रयपुस्तिकायां परिवर्तनं कृत्वा आश्रयराशिः बहुगुणा वर्धिता तथा च सीमितसंसाधनानाम् अभावेऽपि तेषां पुनर्वासार्थं ४५०० कोटिरूप्यकाणां विशेषसंकुलं निर्गतम्। सः अवदत् यत् सिरमौरमण्डले अस्याम् आपदायां ६६ गृहाणि पूर्णतया ७१८ गृहाणि च आंशिकरूपेण क्षतिग्रस्तानि अभवन्। तेभ्यः आश्रयरूपेण प्रायः २० कोटिरूप्यकाणि प्रदत्तानि आसन्। सः अवदत् यत् राज्यसर्वकारः शिक्षाक्षेत्रे प्रतिस्पर्धात्मकरूपेण उन्नयनं कुर्वन् अस्ति तथा च प्रथमश्रेणीतः आङ्ग्लमाध्यमेन शिक्षायाः कृते राजीवगान्धी- दिवस- बोर्डिंग-विद्यालयस्य च अस्मिन् दिशि महत्त्वपूर्णा सिद्धा भविष्यति। सः अवदत् यत् प्रत्येकस्मिन् विधानसभाक्षेत्रे स्थापिताः आदर्शस्वास्थ्यसंस्थाः ग्रामस्तरस्य उत्तमस्वास्थ्यसुविधाः प्रदास्यन्ति।
मुख्यमन्त्री उक्तवान् यत् सः जनबलेन राजनीतिं करोति, तस्य कृते आसन्द: सामान्यजनस्य आशां पूर्णं कर्तुं साधनम् अस्ति। लोकसभानिर्वाचने धनशक्त्या जनमतस्य अपमानं कुर्वन्तः जनाः पाठं पाठयन्तु इति सः जनान् आग्रहं कृतवान्। लोकतन्त्रस्य दमनस्य विपक्षपक्षस्य स्वप्नः स्वप्नमात्रं एव तिष्ठति इति सः अवदत्।
