मातृस्वरूपायाः पृथिव्याः स्वस्थ- समृद्ध- हरित- अस्तित्वाय पर्यावरणसंरक्षणम् आवश्यकम्- डाॅ. अतुलवैद्यः

मातृस्वरूपायाः पृथिव्याः स्वस्थ- समृद्ध- हरित- अस्तित्वाय पर्यावरणसंरक्षणम् आवश्यकम्- डाॅ. अतुलवैद्यः
हिमसंस्कृतवार्ता:- डॉ रेणुकाबोकारे, नागपुरम्।कविकुलगुरु- कालिदास- संस्कृत- विश्वविद्यालयः, रामटेक: इत्यत्र विश्व- पर्यावरण- दिवसस्य अवसरे माननीयानां कुलगुरूणां डाॅ. अतुलवैद्यमहोदयानां करकमलैः विश्वविद्यालयपरिसरे बकुलपादपस्य (मौलसिरी) रोपणं विहितम्। अस्मिन् अवसरे कुलगुरवः डाॅ. अतुलवैद्यमहोदयाः अवदन् यत्– “पर्यावरणसंरक्षणम् अद्यतनयुगस्य महती आवश्यकता वर्तते। वयं स्वकीयेन पर्यावरणानुकूल- आचरणेन प्रकृतेः रक्षां कुर्याम, न्यूनतम् एतच्च निश्चितं कुर्याम यत् अस्माकं कारणतः पर्यावरणस्य कापि हानिः न भवेत्। अद्य यदा भारतं भीषणतापस्य उष्मणा ज्वलन् अस्ति, तदा शीतलां छायां प्रदात्तृणां वृक्षाणां महत्त्वम्, सघनानां वनानाम् अस्तित्वं, जलसङ्कटस्य विभीषिका च अधिकतीव्रतया अनुभूयते। अत एवोक्तम्– ‘शतपुत्रसमो द्रुमः’ अर्थात् एकः वृक्षः शतपुत्राणां सदृशः भवति। ‘एकः पादपः मातुः नाम्नि’ (एक पेड़ माँ के नाम) इति अभियानस्य अन्तर्गतं वयं केवलं वृक्षारोपणमेव न कुर्याम, अपितु तेषां संरक्षणस्य सङ्कल्पमपि गृह्णीयाम। जन्मदात्र्याः मातुः नाम्नि रोपितः वृक्षः अस्माकं मातृस्वरूपायाः पृथिव्याः स्वस्थ- समृद्ध- हरित- अस्तित्वाय परमम् आवश्यकः अस्ति। विश्व- पर्यावरणदिवसस्य पावन- अवसरे प्रत्येकजनः स्वमातृस्वरूपायाः पृथिव्याः कृते न्यूनतम् एतादृशं योगदानं प्रदातुं सङ्कल्पं अवश्यमेव स्वीकुर्यात्।”
अस्मिन् मङ्गले अवसरे सौ. शिल्पावैद्या, योगतज्ञा सौ. ज्योतितुंडुलवार, माननीया अधिष्ठात्री प्रो. कविताहोले, प्रो. कलापिनी अगस्ती, प्रो. प्रसादगोखले, कुलसचिवः डाॅ. रोशनअलोने, ग्रन्थपालः डाॅ. दीपककापड़े, जनसम्पर्काधिकारिणी डाॅ. रेणुकाबोकारे, उद्यानप्रमुखः सुरक्षाधिकारी च श्रीप्रवीणकलम्बे महोदयाः सहित अनेके कर्मयोगिनः उपस्थिताः आसन्।