मुख्यमन्त्रिणा चिनार-पादपरोपण-अभियानस्य प्रथमचरणस्य कृतः शुभारम्भः

मुख्यमन्त्रिणा चिनार-पादपरोपण-अभियानस्य प्रथमचरणस्य कृतः शुभारम्भः
हिमसंस्कृतवार्ता:- शिमला। मुख्यमन्त्री सुखविन्दरसिंहसुक्खु: ‘ओक ओवर शिमला’ इत्यत्र विश्वपर्यावरणदिवसस्य पावन- अवसरे ‘चिनार- पादपरोपण- अभियानस्य’ प्रथमचरणस्य विधिवत् शुभारम्भम् अकरोत्। स्वकीयायै सघनायै छायायै, सौन्दर्याय, पर्यावरणीयमहत्त्वाय च प्रसिद्धः ‘चिनार’ वृक्षः शिमलानगरस्य जलवायु-कृते अतीव अनुकूलः मन्यते। अस्य प्रयासस्य मुख्योद्देश्यं हरितक्षेत्रस्य विस्तार:, पर्यावरणसंरक्षणं प्रति जनचेतनायाः च प्रवर्धनम् अस्ति। अस्मिन् अवसरे मुख्यमन्त्रिणा वानिकी- पर्यावरणप्रबन्धन- पारिस्थितिकीपर्यटन (ईको टूरिज्म) सम्बद्धानां महत्त्वपूर्णानां प्रकाशनानां विमोचनमपि विहितम्। तेन हिमाचलप्रदेशस्य ७५ ईको- टूरिज्म- स्थलानाम् उपरि आधारितायाः ‘कॉफी टेबल बुक’ (चित्रमय-पुस्तिकायाः) विमोचनं कृतम्, यस्यां राज्यस्य प्रमुखाणां पर्यावरणीय- पर्यटनस्थलानाम् आकर्षकः परिचयः प्रस्तुतः अस्ति।
मुख्यमन्त्रिणा अस्मिन् अवसरे उपस्थितान् जनान् सम्बोधयता कथितं यत् एतानि प्रकाशनानि वनविभागस्य अधिकारिणां, कर्मचारिणां, शोधकर्तृणाम्, नीतिनिर्मातृणां तथा च पर्यावरणसंरक्षणे रुचिं प्रदर्शयन्त: सर्वेषां जनानां कृते उपयोगीनि सिद्धाः भविष्यन्ति। सः विश्वासं प्रकटितवान् यत् एतानि पुस्तकानि वनप्रबन्धन- जैवविविधतासंरक्षण- ईकोटूरिज्मक्षेत्रेषु ज्ञानस्य जागरूकतायाः च वर्धने प्रमुखां भूमिकां निर्वक्ष्यन्ति। विश्वपर्यावरणदिवसस्य उपलक्षणे मुख्यमन्त्रिणा राजकीय- वरिष्ठ- माध्यमिक- विद्यालय: पोर्टमोर इत्यस्य छात्रेभ्यः ‘चिल्ड्रन ऑफ द स्टेट’ (राज्यस्य बालकेभ्यः) च पादपाः अपि उपहाररूपेण प्रदत्ताः। अस्मिन् अवसरे विधायकः विनोदसुल्तानपुरी, सुदर्शनबबलू, हरदीपबावा, शिमला-नगरनिगमस्य महापौरः सुरेन्द्रचौहानः, हिमाचलप्रदेशराज्यवनविकासनिगमस्य उपाध्यक्षः के. एस. खाची, एच. पी. सी. सी. महासचिवः विनोद जिंटा, मुख्यसचिवः के. के. पन्तः, प्रधानमुख्य- अरण्यपालः डाॅ. सञ्जयसूदः अन्ये च गण्याः उपस्थिताः आसन्।