भोपालपरिसरस्य सनातन- कर्मकाण्डाध्यात्मसमितिश्च संयुक्ततत्त्वावधानेन श्रावणी- उपाकर्मसम्पन्न:

केन्द्रीय- संस्कृत- विश्वविद्यालयस्य भोपालपरिसरस्य सनातन- कर्मकाण्डाध्यात्मसमितिश्च संयुक्ततत्त्वावधानेन श्रावणी- उपाकर्मसम्पन्न:
हिमसंस्कृतवार्ता:- प्रवेशकुमारशुक्लः भोपालम्, ९ अगस्तः २०२५
श्रावणपूर्णिमायां प्रातः नववादने शीतलदासस्य उद्याने, कमला उद्याने महातडागस्य तटे, भोपालनगरे श्रावणी- उपाकर्मसमारम्भः वैदिकविधिपूर्वकं सम्पन्नः। अस्मिन्नुत्सवे द्विशताधिकाः वैदिकसनातनीभ्रातरः पुण्यलाभं प्राप्तवन्तः।
समारम्भे आचार्यः डॉ. रामकुमारदेवलियः वैदिकविधिना संकल्पं पूजनं च सम्पन्न्य व्याचष्ट– प्रतिवर्षं हेमाद्रिसंकल्पपूर्वकं प्रायश्चित्तार्थं दशविधिस्नानं, वेदपूजनम्, ऋषिपूजनम्, ऋषितर्पणं, नूतनयज्ञोपवीतधारणं च पञ्चब्राह्मणैः क्रियते इति। अस्मिन्नवसरे केन्द्रीय- संस्कृत- विश्वविद्यालयस्य भोपालपरिसरस्य निदेशकः प्रो. रमाकान्तपाण्डेयः श्रावण्याः महत्त्वं प्रकाशयता भणितं यत् वर्षपर्यन्तं कृतानां ज्ञाताज्ञातपापानां प्रायश्चित्तं शुद्धिकरणं च कृत्वा, पूर्वजऋषीणां तर्पणं पूजनं च कृत्वा नूतनयज्ञोपवीतधारणस्य परम्परा प्रचलिता अस्तीति। आयोजने प्रो. सुबोधशर्मा, प्रो. सनन्दनकुमारत्रिपाठी, प्रो. कृपाशङ्करशर्मा, डॉ. नन्दकिशोरतिवारी, डॉ. राहुलशर्मा, डॉ. जितेन्द्रतिवारी, डॉ. आशुतोषतिवारी, डॉ. रोहितपचौरीप्रभृतया: सनातनधर्मसस्यास्योपासका: सानन्दम् उपस्थिताः आसन्। धार्मिकभावेन, वैदिकमङ्गलध्वनिभिः सुसम्पन्नः अभवत्।