विपक्षनेता जयरामठाकुरः केन्द्रीयवित्तमन्त्रिणं मिलित्वा, साहाय्यं याचितवान्

विपक्षनेता जयरामठाकुरः केन्द्रीयवित्तमन्त्रिणं मिलित्वा, साहाय्यं याचितवान्
हिमसंस्कृतवार्ता: – नवदेहली। विपक्षस्य नेता जयरामठाकुरः हिमाचलप्रदेशस्य सर्वैः सांसदैः सह, आपदाप्रभावितक्षेत्रेभ्यः विधायकैः भाजपाप्रदेशाध्यक्षेण च सह केन्द्रीयवित्तमन्त्री निर्मलासीतारमण इत्यनया सह मिलित्वा आपद: हिमाचलप्रदेशस्य क्षतिविषये बोधयित्वा आपदाप्रभावितक्षेत्रेषु पुनर्निर्माणार्थं पुनर्वासार्थं च अधिकतमं आर्थिकसहायतां याचितवान्। जयरामठाकुरेण प्रस्तूयमाणे अभिलेखे हिमाचलप्रदेशे आपत्काले नष्टानां निजी-सर्वकारीय-सम्पत्त्याः हानिः इति विवरणं दृश्यते स्म । जयरामठाकुरः उक्तवान् यत् आपदाकारणात् मण्डीमण्डलस्य सराज, नाचन, करसोग, धर्मपुरम् इत्येतानि विधानसभाक्षेत्राणि तथा चम्बा इत्यस्य अनेकानि क्षेत्राणि दुर्घटितानि सन्ति। १२०० कोटिरूप्यकाधिकं धनहानिः अभवत्, ५० तः अधिकाः जनाः प्राणान् त्यक्तवन्तः । जूनमासस्य ३० दिनाङ्कस्य एव आपदि ४२ जनाः मृताः ।अस्याः आपद: कारणेन ७०० तः अधिकानि गृहाणि पूर्णतया नष्टानि अभवन् । १००० तः अधिकानि गृहाणि आंशिकरूपेण नष्टानि सन्ति किन्तु ते निवासयोग्याः न सन्ति । अस्याः आपद: कारणेन सहस्राधिकाः पशुशालाः, सहस्राधिकाः पशुधनानि अपि नष्टानि सन्ति । तेन सह जनानां कृषिभूमिः, सस्यानि इत्यादयः नष्टानि अभवन् । यस्मात् कारणात् तेषां आजीविका अपि अपहृता अस्ति। अतः आपदाग्रस्तानां जनानां कृते महत: समर्थनस्य आवश्यकता वर्तते। वित्तमन्त्री हिमाचलप्रदेशस्य सर्वथा साहाय्यं कर्तुं आश्वासनं अददत्। ज्ञातव्यं यत् जयरामठाकुरः विगतदिने एव भाजपादलस्य राष्ट्रियाध्यक्षेण जगतप्रकाशनड्डावर्येण, उक्तजनप्रतिनिधिभिः प्रदेशाध्यक्षेण च सह केन्द्रीयगृहमन्त्रिणा अमितशाहेन, केन्द्रीयमार्गपरिवहनमन्त्रिणा नितिनगडकरिणा, जलसंसाधनमन्त्रिणा सी.आर.पाटिलेन च मिलित्वा हिमाचलस्य अधिकतमसमर्थनस्य अनुरोधं कृतवान्।