भारतीयान्तरिक्षयात्री शुभांशु-शुक्लः एक्जियोम्-4 इत्यभियानाय यानारूढोऽजायत,

भारतीयान्तरिक्षयात्री शुभांशु-शुक्लः एक्जियोम्-4 इत्यभियानाय यानारूढोऽजायत,
राकेशशर्मणः अनन्तरं चतुर्षु दशकेषु अन्तरिक्षं गच्छन्प्रथमः भारतीयः
हिमसंस्कृतवार्ता: – भारतीयः अन्तरिक्षयात्री शुभांशुशुक्लः एक्जियोम्-4 इत्यभियानेन अन्तरिक्षं प्रस्थितवान्, अवसरोऽयं देशाय ऐतिहासिकमहत्वधायी वर्तते। अवधेयं वर्त्तते यत् राकेश-शर्मणः अनन्तरं शुक्लः चतुर्ष दशकेषु प्रथमः भारतीयः अस्ति यः अन्तरिक्षं प्रविशति। प्राप्तवार्तानुसारं भारतीय-मानक-समयानुसारम् एकाधिकद्वादशवादने संयुक्तराज्यामेरिकादेशस्य फ़्लोरिडा-नगरस्य केनेडी-स्पेस्-केन्द्रात् एतत् प्रक्षेपणम् अभवत् । एक्सिओम् मिशन् इत्यस्य नेतृत्वं अमेरिकादेशस्य कमाण्डर पेगी विट्सन् इत्येषः करोति, यत्र भारतीय-वायुसेनायाः ग्रूप्-केप्टन् शुभांशु-शुक्लः मिशन्-पायलट इति रूपेण, हंगेरियन्-अन्तरिक्षयात्री टिबोर् कापू, पोलिश्-अन्तरिक्षयात्री स्लावोस् उज़्नान्स्की-विस्त्रीव्स्की च अभियानस्यास्य विशेषज्ञरूपेण सन्ति। भारतीय-अन्तरिक्ष-अनुसन्धान-सङ्घटनम् अवदत् यत्, एक्जियोम्-4 इति सायं सार्धचतुर्वादने अन्ताराष्ट्रिय-अन्तरिक्ष-स्थानकेन सह सम्पर्कं करिष्यति। ग्रूप्-केप्टन् शुक्लः अन्तरिक्षात् सन्देशम् प्रेषितवान् यत् एषा अद्भुतयात्रा अस्ति । सः अवदत् यत् एषा यात्रा अन्ताराष्ट्रिय-अन्तरिक्षकेन्द्रस्य आरम्भः नास्ति अपितु भारतस्य मानव-अन्तरिक्ष-कार्यक्रमस्य आरम्भः वर्त्तते । ग्रूप्-केप्टन् शुक्लः जयहिन्दू जयभारत् इति उक्त्वा प्रत्येकं भारतीयः तस्य भागः भवितुं च आमन्त्रयत्। शुभांशु-शुक्लः अन्ताराष्ट्रिय-अन्तरिक्षस्थानके स्वस्याभियाने सप्तविशिष्टानि सूक्ष्म-गुरुत्वीय च प्रयोगाणि करिष्यति। ध्यातव्यं वर्त्तते यत् शुक्लाय अवसरोऽयम् भारतीय-वायुसेनायाः विङ्ग्-कमाण्डर् राकेश्-शर्मणः अनुकरणात्मकं भविष्यति, यः सोवियत्-इण्टर्कोस्मोस्-कार्यक्रमस्य भागत्वेन चतुरशीत्यधिकैकोनविंशतितमवर्षस्य अप्रैलमासस्य तृतीय-दिनाङ्के सोयुज्-टी-11 इत्यस्मिन् उड्डीयत। शर्मा-वर्यः साल्युट् -7 इति अन्तरिक्षस्थानके सप्तदिनानि अन्तरिक्षे एवं व्यतीतवान्।राष्ट्रपतिः द्रौपदीमुर्मूः भारताय अन्तरिक्षीय-नूतनसोपानस्य उद्घाटनाय शुक्लं अभिनन्दितवती; प्रधानमन्त्री नरेन्द्रमोदी च अवदत् यत् सः चत्वारिंशदधिकैकशतकोटि-भारतीयानां आशाम् आकांक्षाञ्च वहति।
राष्ट्रपतिपदासीना द्रौपदीमुर्मू: इत्येषा अकथयत् यत् शुभांशुशुक्लः भारताय अन्तरिक्षस्य नूतनं सोपानमुद्घाटयन्नस्तीति मत्वा, आराष्ट्र नक्षत्राणां यात्रायै गर्वोत्साहाभ्यां भरितमस्ति। सामाजिक-प्रसार माध्यमे राष्ट्रपतिः मुर्मुः अवदत् यत्, शुक्लः तस्य सहान्तरिक्षयात्रिणश्व वस्तुतः वसुधैव कुटुंबकमिति सिद्धीकृतवन्तः। सा अभियानस्य सफलतायै शुभाशयाः प्रेषितवती। प्रधानमन्त्री नरेन्द्रमोदी सामाजिक-प्रसार-माध्यमेन अन्तरिक्षाभियानाय सफल-प्रक्षेपणस्य स्वागतम् अकरोत्, श्रीमोदी अवदत् यत्, भारतीयान्तरिक्षयात्री ग्रूप्-क्याप्टन् शुभांशु शुक्लः अन्ताराष्ट्रिय-अन्तरिक्ष केन्द्रम् प्रति गन्ता प्रथमः भारतीयः भवन्नस्ति। प्रधानमंत्री अवदत् यत्, ग्रूप्-क्याप्टन् शुक्लः चत्वारिंशदधिकैक-शतकोटि-भारतीयानां शुभाशयाः, आशाः, अभिलाषाश्च वहति। केन्द्रीय-अन्तरिक्ष-राज्यमन्त्री डा. जितेन्द्र-सिङ्ङ्घः नवदेहल्यां वार्तालापं कुर्वन् अवदत् यत्, शुभान्शु शुक्लः अस्य सम्पूर्णस्य अभियानस्य महत्त्वपूर्णः घटकः भविष्यति।