Kinnaur News : किन्नौरे शीघ्रमेव हेलीपोर्ट् निर्मितं भविष्यति, क्रीडासङ्कुलस्य निर्माणमपि भविष्यति- मुख्यमंत्री सुखविन्दरसिंहसुक्खुः
हिमसंस्कृतवार्ता:- किन्नौरम्।
मुख्यमन्त्री सुखविन्दरसिंहसुक्खुः शनिवासरे सायं जनपदे किन्नौरे चतुर्दिवसीय राज्यस्तरीय किन्नौरमहोत्सवस्य समापनसमारोहस्य अध्यक्षता अकरोत्। सः अवदत् यत् अयं उत्सवः किन्नौरस्य पारम्परिक- सङ्गीत- नृत्य- कला- शैल्याः प्रतिबिम्बः अस्ति। मुख्यमन्त्री किन्नौरजनपदस्य जनान् किन्नौरस्य अद्वितीयपरम्पराणां संरक्षणाय, प्रोत्साहनाय च प्रशंसितवान्। सः अवदत् यत् एतादृशाः उत्सवाः न केवलं समुदायस्य एकीकरणं कुर्वन्ति अपि तु राज्यस्य समृद्ध- सांस्कृतिक- धरोहरस्य विषये जनान् अवगतं कुर्वन्ति। राज्यसर्वकारः राज्यस्य समृद्धसंस्कृतेः संरक्षणाय यथाशक्ति प्रयत्नः कुर्वन् अस्ति। सः अवदत् यत् सर्वकारेण आदिवासीक्षेत्राणां विकासाय, अत्रत्यानां जनानां सामाजिक- आर्थिक- उत्थानार्थं च विविधाः योजनाः प्रारब्धाः, किन्नौरे शीघ्रमेव हेलीपोर्ट्-निर्माणं भविष्यति। एतदतिरिक्तं मादकद्रव्याणां दुष्प्रभावात् अत्रत्यानां युनां रक्षणार्थं २८ कोटिरूप्यकाणां व्ययेन क्रीडासङ्कुलस्य निर्माणं क्रियते। सः अवदत् यत् राज्यसर्वकारः किन्नौरमण्डलस्य टापरीनगरे भूतापीप्रौद्योगिक्याः उपयोगेन विश्वस्य प्रथमं नियन्त्रितवायुमण्डलभण्डारणं (CA store) निर्माति। एतदर्थं आइसलैण्ड- हिमाचल- सर्वकारयोः मध्ये सहमतिपत्रे हस्ताक्षरं कृतम् अस्ति। एतेन क्षेत्रस्य उद्यानपालकेभ्य: लाभः भविष्यति, तेषाम् अर्थव्यवस्था च सुदृढा भविष्यति। सः अवदत् यत् उद्यानक्षेत्रं सुदृढं कर्तुं राज्यसर्वकारेण सार्वभौमिकपेटिका: (यूनिवर्सल कार्टन) आरब्धा, यस्य अन्तर्गतं प्रतिकिलोग्रामस्य आधारेण उद्यानपालकेभ्य: सेबस्य क्रयणं क्रियते, यत् केवलं सर्वकारस्य सुशासनव्यवस्थायाः कारणेन एव सम्भवं जातम्। सः अवदत् यत् किन्नौरस्य निगुलसरीक्षेत्रे वर्षाकारणात् अधिकांशकालं मार्गः अवरुद्धः एव तिष्ठति। राज्यसर्वकारेण रिकाङ्गपियो इत्यस्य कृते वैकल्पिकमार्गनिर्माणार्थं ५ कोटिरूप्यकाणां प्रावधानं कृतम् अस्ति येन क्षेत्रस्य निवासिनः असुविधायाः सम्मुखीकरणं न कुर्वन्ति।
