हिमाचलस्य रजतकुमारः सीडीएस परीक्षायां देशे शीर्षस्थानं प्राप्तवान्
हिमसंस्कृतवार्ता- कार्यालयीय: प्रतिनिधि:।
संघ-लोकसेवा-आयोगेन यूपीएससी सीडीएस-२ परीक्षाया: अन्तिमपरिणामः प्रकाशितः। हिमाचलप्रदेशस्य शाहपुरगोरडाक्षेत्रस्य निवासी रजतकुमारः सीडीएसपरीक्षायां सम्पूर्णभारते प्रथमस्थानं प्राप्य राज्यस्य क्षेत्रस्य च गौरवम् आनयत्। रजतस्य एतस्याः सिद्धेः कारणात् परिवारजनानां मध्ये सुखस्य तरङ्गः वर्तते ।
शाहपुरस्य रजतः प्रशिक्षणं विना एकवर्षे एव सीडीएस- परीक्षां उत्तीर्णवान्
रजतकुमारः सीडीएस परीक्षायां सम्पूर्णे भारते प्रथमस्थानं प्राप्य शाहपुरं गौरवम् आनयत्। अस्याः परीक्षायाः परिणामः २१ एप्रिल दिनाङ्के घोषितः। विशेषं तु एतत् यत् रजतः न केवलम् अस्याः परीक्षायाः प्रशिक्षणं विना उत्तीर्णः अपितु देशे अपि शीर्षस्थानं प्राप्तवान्।
गतवर्षे एव रजतः राजकीयमहाविद्यालयशाहपुरतः बीए परीक्षायां ८२ प्रतिशतं अंकं प्राप्य महाविद्यालये शीर्षस्थाने आसीत्। अस्य कृते रजतेन छात्रवृत्तिः अपि प्राप्ता। साधारणपरिवारस्य रजतस्य पिता प्रदीपकुमारः भारतीयडाकसेवायाः भानालाशाखायां कार्यं कुर्वन् अस्ति। माता स्वस्य पुत्रस्य सफलतां दृष्ट्वा आनन्दिता अस्ति।
भराड़ीघाटस्य नमनः सीडीएस परीक्षायां १४तमं स्थानं प्राप्तवान्
अर्की उपमण्डलस्य भराड़ीघाटपञ्चायतस्य कालर- जेरीग्रामस्य नमनकुमारः सीडीएस परीक्षायां देशे १४तमं स्थानं प्राप्य स्वस्य नाम प्रसिद्धं कृतवान्। अधुना सः भारतीयसेनायां लेफ्टिनेंटरूपेण देशस्य सेवां करिष्यति। नमनकुमारस्य पिता नरेन्द्रकुमारः अपि भारतीयसेनायाः सेवां कृतवान्। माता ममता वर्मा गृहिणी अस्ति। नमनः प्रथमप्रयासे एव एतां परीक्षां उत्तीर्णः अभवत्। २० वर्षीयः नमनः स्वस्य सफलतायाः श्रेयः स्वमातापितृभ्यां परिवारजनेभ्यः च दत्तवान्। नमनः विशेषप्रशिक्षणं विना एतत् पराक्रमं प्राप्तवान्। सः दृढनिश्चयेन, स्वाध्यायेन च सफलतां प्राप्तवान्। न केवलं तस्य परिवारः अपितु सम्पूर्णः ग्रामः सोलनमण्डलं च तस्य उपलब्ध्या गर्वितः अस्ति। तस्य सफलतायाः कारणात् युनां कृते नूतना प्रेरणा, दिशा च प्राप्ता अस्ति। तस्य पदम् अन्येषां युवानां कृते उदाहरणं प्रेरणा स्रोतः च भविष्यति।
