तुलसी बणा कने बसूटी
गांवां च थी इक पहटी
सारे सलूणे थे बणिरे बड़े स्वाद
धोतवीं दाल़ी च था क्यू बौहत ज़्यादा
पित्या ठंडा पाणी गल़ा हुई गया खराब
नक़्क़ हुई गया बन्द मुश्किल हुई गया लैणा साह
स्वादा रे चक्करा च पई गया इक होर फाह
खंग सिर दर्द हुई कने आई गया बुखार
पक्के मुल्ले पई गया भटिया रा चाव
नक्का खोलणे जो अम्म़े ल्यान्दी छिक्कजड़ू बूटी
पाणे ते बाद नक़्क़ ईयाँ बगेया जियाँ पाणिएं री टूटी
लई अपणी बनाईरी देसी आयुर्वेदिक दवाई
तिसा बिच जे पईरी थी तुलसी बणा कने बसूटी
पुराणे टैमा च वैद्य देंदे थे जड़ी बूटियां री बणीरी दवाई
खर्च बी घट हुँदा था कने हुँदा था असर ज़्यादा
नब्ज देखी कने ई दसी देंदे थे क्या ई बमारी
दो खुराकां ते बाद ई बमारिया रा असर रई जांदा था अधा
ब्याह पहटी कुछ भी होवे सारे सलूणे खाणे पर
तरीदार सलूणा खाणे ते बाद कदी नी पीणा ठंडा पाणी
छाती हुई जाणी जाम कने गल़ा बी हुणा खराब
धोतवीं दाल़ ठंडी छूणी नी बस गर्म गर्म ई खाणी
कईयाँ जो पची जांदे तरीदार सलूणे
किसी जो नी पचदी छोलेयां री दाल
किसी जो थोड़ा खादय बी नी पचदा
किसी री पहरदी ई नी गरनाल
रवींद्र कुमार शर्मा
घुमारवीं
जिला बिलासपुर हि प्र
