साहित्य अकादमी दिल्ली द्वारा “युवा-साहिती” समनुष्ठास्यते

साहित्य अकादमी दिल्ली। साहित्याकादमीद्वारा “युवा-साहिती” समनुष्ठास्यते
साहित्य अकादमीद्वारा दिल्ल्यां प्रगति मैदान प्राङ्गणे ऐषमो विश्व-पुस्तक-मेलापकस्य अवसरे फरवरी मासस्य चतुर्दश्यां वसन्तपञ्चम्या: पावने अवसरे “युवा साहिती” इति प्रकल्पस्य अन्तर्गतं द्वि-सङ्ख्याके सभागारे कवीनां काव्यरचनापाठ: आयोक्ष्यते। अस्मिन् साहित्यिके समनुष्ठाने संस्कृतभाषाया: साहित्यकारत्वेन कवित्वेन च समवाप्तयुवपुरस्कार: डॉ. युवराजभट्टराईवर्य: समामन्त्रितो वर्तते।
असौ तत्र काव्यपाठकार्यक्रमे देवगणपूताया: ऋषिमुनिसाधिताया: संस्कृतमातु: समर्चायां नैजी: भूरि संस्कृतरचना: प्रस्तोष्यति। अस्य कविसम्मेलनस्य समायोजनस्य वास्तविक: उद्देश्य: नागरिकेषु साहित्यम्प्रति कविताम्प्रति च आकर्षणपूर्वकं तेषां जागरूकताया: रुचिमत्तायाश्च प्रवर्धनं समुत्पादनञ्चास्ति।