बॉलीवुड- अभिनेता नानापाटेकर: – चलचित्र-छायाङ्कनाय शिमलाम् प्राप्तवान्

चलचित्र-छायाङ्कनाय शिमलाम् प्राप्तवान् बॉलीवुड- अभिनेता नानापाटेकर:
हिमसंस्कृतवार्ताः – शिमला।
बॉलीवुड अभिनेता नानापाटेकर: चलचित्र-छायाङ्कनाय शनिवासरे सायङ्काले शिमलाम् प्राप्तवान्। ध्यातव्यं वर्तते यत् नानापाटेकर: प्रथमवारं शिमलाम् प्राप्तवान् अस्ति। शिमलाया: मशोबरायां अतिथिगृहे प्राप्ते सति भव्यं स्वागतम् विहितम्। अनेन सह अभिनेत्री सिमरत कौर अभिनेता उत्कर्ष शर्मा चापि सम्प्राप्तौ। कॉमेडियन राजपाल: यादव: अपि गतदिवसे शिमलाम् समागत:। शिमलायाम् चलचित्रस्य छायाङ्कनं भविष्यति। चलचित्रस्य छायाङ्कनं मशोबरायां नालदेहरायां कुफरी इत्यत्र मालरोडे च भविष्यति। २० फरवरी यावत् अभिनेतार: पर्वतराज्ञा: शिमलाया: उपत्यकासु अभिनयं करिष्यन्ति। इत: पूर्वं चलचित्रस्य छायाङ्कनं वाराणस्यां सम्पन्नम्। एतद् चलचित्रं पिता पुत्रस्य च सम्बन्धे चित्रीयते। यत्र नानापाटेकर: पितु: अभिनयं करोति उत्कर्ष शर्मा च पुत्रस्य अभिनयं करोति। अभिनेत्री सिमरत कौर चलचित्रस्य नायिका अस्ति। कॉमेडियन राजपाल: यादव: विनोदप्रियाभिनयं करिष्यति। चलचित्रस्य निर्देशक: अनिल शर्मा अपि शिमलाम् आगमिष्यति। बहलप्रोडक्शन इत्यस्य प्रबन्धक- निदेशक: विकासबहल: अवदत् यत् १६ जनवरीत: मशोबरायां चलचित्रस्य छायाङ्कनं आरप्स्यते। तत: शिमलाया: अन्येषु पर्यटनस्थलेषु छायाङ्कनं भविष्यति। चलचित्रस्य छायाङ्कनं २० फरवरी यावत् चलिष्यति।